५०० भन्दा बढी साहाराविहीन आप्रवासी बालबालिकालाई देश निकाला गर्ने ट्रम्प प्रशासनको तयारी, अमेरिकी सिनेटरद्वारा चेतावनी
न्युयोर्क- ट्रम्प प्रशासनले कानुनी प्रक्रिया र संरक्षणलाई मिचेर ५०० भन्दा बढी साहाराविहीन आप्रवासी बालबालिकाहरूलाई द्रुत गतिमा देश निकाला गर्ने तयारी गरिरहेको भन्दै एक अमेरिकी सिनेटरले चेतावनी दिएका छन्। ओरेगनका डेमोक्र्याट सिनेटर रन वाइडेनले स्वास्थ्य मन्त्री रोबर्ट एफ केनेडी जुनियरलाई पत्र लेख्दै यस योजनालाई तत्काल रोक्न माग गरेका हुन्।
सिनेटर वाइडेनका अनुसार सरकारले कम्तीमा १८० दिनदेखि सरकारी संरक्षण वा विभिन्न परिवारको रेखदेखमा रहेका बालबालिकाहरूको सूची तयार पारेको छ। अमेरिकामा उनीहरूको जिम्मेवारी लिने कोही पनि नभएका कारण उनीहरूलाई ग्वाटेमाला, होन्डुरस, एल साल्भाडोर र अफगानिस्तान जस्ता देशहरूमा फिर्ता पठाउन लागिएको दाबी गरिएको छ।
यसअघि सन् २०२५ मा पनि ट्रम्प प्रशासनले यस्तै प्रयास गरेको थियो, जतिबेला ‘लेबर डे’ को सप्ताहन्तमा दर्जनौँ बालबालिकाहरूलाई रातारात बसमा राखेर विमानस्थल पुर्याइएको थियो। तर, मध्यरातमा एक संघीय न्यायाधीशले सो विमान उड्नबाट रोकेका थिए। वकिलहरूका अनुसार त्यो घटनाका कारण धेरै बालबालिकाहरू गम्भीर मानसिक आघातमा परेका थिए।
यता स्वास्थ्य मन्त्रालयका प्रवक्ताले भने सिनेटर वाइडेनको यो दाबीलाई ‘निराधार र डर फैलाउने प्रयास’ भन्दै अस्वीकार गरेका छन्। उनले सरकारले बालबालिकालाई देश निकाला गर्न नभई उनीहरूका आमाबुबा वा कानुनी अभिभावक पत्ता लगाएर सुरक्षित रूपमा जिम्मा लगाउने काम मात्र गरिरहेको दाबी गरे। यद्यपि, अधिकारवादीहरूले भने सरकारले कानुनी प्रावधानहरूलाई छलेर बालबालिकाहरूको जीवन जोखिममा पार्न खोजेको आरोप लगाएका छन्।
