अध्यागमन अधिकारीबाट भाग्दै गर्दा ट्रकको ठक्करबाट एक व्यक्तिको मृत्यु

न्युयोर्क- अमेरिकाको फ्लोरिडामा अध्यागमन अधिकारीहरूबाट भाग्ने क्रममा एक २८ वर्षीय पुरुषको ट्रकको ठक्करबाट मृत्यु भएको छ। प्रहरीका अनुसार मंगलबार बिहान एउटा पेट्रोल पम्पमा अधिकारीहरूले सोधपुछ गर्न खोज्दा गाडीमा रहेका चार जना भागेका थिए। त्यसमध्ये हतारहतार बाटो काट्दै गरेका ती व्यक्तिलाई ट्रकले ठक्कर दिएको थियो। ठक्कर दिने ट्रकका चालकले उनलाई बचाउने प्रयास समेत गरेका थिए।

यो एक साताभित्र अमेरिकी अध्यागमन अधिकारीहरूसँगको जम्काभेटमा भएको तेस्रो मृत्यु हो। यसअघि टेक्सास र मेन राज्यमा पनि अधिकारीहरूको कारबाहीका क्रममा आप्रवासीको ज्यान गएको थियो। राष्ट्रपति डोनाल्ड ट्रम्पले गत वर्षदेखि सुरु गरेको ठूलो संख्यामा देशनिकाला गर्ने अभियानयता अधिकारीहरूसँग जोडिएर मृत्यु भएको यो दशौँ घटना हो। अमेरिकी गृह मन्त्रालयले घटनामा एक मेक्सिकन नागरिकको ज्यान गएको पुष्टि गर्दै अनुसन्धान भइरहेको बताएको छ।

यस घटनालाई लिएर स्थानीय सांसद एन्जी निक्सनले अध्यागमन निकाय नियन्त्रण बाहिर गएको भन्दै आलोचना गरेकी छन्। उनले यस्ता कार्यले समाजमा डर, भताभुंग अवस्था र मृत्यु मात्र निम्त्याएको बताइन्। यसअघि पनि क्यालिफोर्निया र भर्जिनियामा अधिकारीहरूबाट भाग्ने क्रममा गाडीको ठक्करबाट दुई जना आप्रवासीको मृत्यु भएको थियो। यसैबीच, मेक्सिको सरकारले आप्रवासीहरूको मृत्युको विषयमा आपराधिक मुद्दा चलाउन सकिने वा नसकिनेबारे समीक्षा गर्न अमेरिकी अधिकारीहरूलाई आग्रह गरेको छ।