अमेरिकाले भ्रमण भिसामा २० हजार डलरसम्म धरौटी राख्नुपर्ने नियम स्थायी बनायो

न्युयोर्क- अमेरिकाको विदेश मन्त्रालयले बी-१ र बी-२ (भ्रमण र व्यापारिक) भिसाका आवेदकका लागि धरौटी राख्नुपर्ने नियमलाई स्थायी बनाएको छ। अगस्ट ३, २०२६ मा प्रकाशित यो नियमले सन् २०२५ अगस्ट २० मा सुरु भएको १२ महिने परीक्षण कार्यक्रमलाई स्थायी रूप दिएको हो। नयाँ व्यवस्थाअनुसार कन्सुलर अधिकारीले भिसा दिनुअघि २० हजार डलरसम्म धरौटी (भिसा बोन्ड) माग्न सक्नेछन्। विदेशीहरू भिसा अवधि सकिएपछि आफ्नै देश फर्किऊन् र नियम पालना गरून् भन्ने उद्देश्यले यो नियम ल्याइएको हो।

यो कार्यक्रम ‘कार्यकारी आदेश १४१५९’ अन्तर्गत अमेरिकी नागरिकको सुरक्षालाई ध्यानमा राखेर तयार पारिएको हो। विशेषगरी भिसा अवधि सकिएर पनि अमेरिकामै लुकेर बस्ने दर उच्च भएका, सूचना आदानप्रदानमा कमजोर रहेका र सुरक्षा जाँच अपर्याप्त भएका देशका नागरिकलाई यो नियम लागू हुनेछ। ‘भिसा छुट कार्यक्रम’ (भिसा वेभर प्रोग्राम) मा सहभागी देशहरू भने यसमा पर्ने छैनन्। नियम लागू हुने देशको सूची १५ दिनअघि वेबसाइटमा सार्वजनिक गरिनेछ र त्यसलाई आवश्यकताअनुसार परिमार्जन गर्न सकिनेछ।

कन्सुलर अधिकारीले आवेदकको अवस्था हेरेर १० हजार, १५ हजार वा २० हजार डलर धरौटी तोक्न सक्नेछन्। सामान्यतया १५ हजार तोकिनेछ, तर खर्च धान्न नसक्ने अवस्था देखिएमा १० हजार र नियम तोड्ने जोखिम बढी देखिएमा २० हजार डलर तोकिनेछ। यो रकम अक्टोबर १, २०२७ देखि हरेक ७ वर्षमा मूल्यवृद्धिका आधारमा समायोजन हुनेछ। गैरकानुनी रूपमा बस्नेलाई देश निकाला गर्दा लाग्ने अनुमानित १८ हजार ४२ डलर खर्चलाई आधार मानेर यो रकम तय गरिएको हो।

आवेदकले तोकिएको विद्युतीय माध्यम (क्रेडिट कार्ड, डेबिट कार्ड वा वायर ट्रान्सफर) बाट अमेरिकी डलरमा पैसा बुझाउनुपर्नेछ। धरौटी तिरेपछि मात्रै आवेदकले ३ महिनादेखि १२ महिनासम्मको भिसा पाउन सक्नेछन्। यसमा आवेदक आफैँले धरौटी छुट माग्न पाउने छैनन्, तर विशेष मानवीय वा राष्ट्रिय हितको अवस्थामा कन्सुलर अधिकारीले छुट दिन सक्नेछन्। यस प्रक्रियाका लागि नयाँ फारम भर्नुपर्नेछ, जसका लागि औसत ३० मिनेट लाग्ने अनुमान गरिएको छ।

भिसाको नियम पालना गरेर व्यापारिक विमानस्थल हुँदै समयमै अमेरिका छाडेमा वा भिसा प्रयोग नगरेमा यो रकम फिर्ता पाइनेछ, तर यसमा कुनै ब्याज दिइने छैन। यद्यपि, समयमै देश नछाडेमा, ढिलो गरी भिसाको म्याद थप्न खोजेमा वा शरणार्थी (एसाइलम) दाबी गरेमा धरौटी रकम पूर्ण रूपमा जफत हुनेछ।

परीक्षणकालमा ५० देशका करिब २० हजार आवेदकलाई यो नियम लागू गरिएको थियो, जसमध्ये आधाले मात्र धरौटी तिरेर भिसा लिएका थिए। यसले गर्दा सर्वसाधारणलाई करिब ११ करोड ५० लाख डलरको भार परेको थियो भने ती देशबाट भिसा जारी हुने दर ८३ प्रतिशतले घटेको थियो। सन् २०२४ मा ती ५० देशका ४५ हजार ४८८ जनाले भिसा अवधि नाघेका थिए भने धरौटी परीक्षण सुरु भएको १० महिनामा नियम तोड्नेको सङ्ख्या घटेर ५० भन्दा तल झरेको थियो।