अध्यागमन पक्राउ गर्ने स्थानीय प्रहरीलाई कानुनी बिमा दिने अमेरिकी योजना

अमेरिकी अध्यागमन तथा भन्सार कार्यान्वयन निकाय (आईसीई) ले अध्यागमन कानुनअन्तर्गत पक्राउ गर्ने स्थानीय प्रहरी अधिकारीहरूलाई कानुनी बिमाको सुविधा दिने योजना प्रस्ताव गरेको छ। ड्युटीका क्रममा कुनै गल्ती वा दुर्व्यवहारको आरोप लागेमा उनीहरूलाई आर्थिक जरिवानाबाट जोगाउन यो योजना ल्याइएको हो।

योजनाअनुसार, अधिकारीहरूले ५ लाख डलरसम्मको व्यक्तिगत दायित्व बहन गर्ने बिमा खरिद गर्न सक्नेछन्। यसबापत लाग्ने वार्षिक करिब २५० डलर आईसीईले नै तिरिदिनेछ। राष्ट्रपति डोनाल्ड ट्रम्प पुनः ह्वाइट हाउस फर्किएपछि स्थानीय प्रहरी र आईसीईबीचको सहकार्य बढेको छ। तर, धेरै स्थानीय प्रहरी विभागहरूले पक्राउका क्रममा लाग्न सक्ने मुद्दा र आर्थिक दायित्वको डरले यसमा सामेल हुन हिचकिचाइरहेका थिए। यो बिमा योजनाले उनीहरूको त्यो डर हटाउने अपेक्षा गरिएको छ।

सन् २०२६ को पहिलो दुई महिनामा मात्रै यस्ता कार्यक्रममार्फत मासिक औसत ३,००० जना पक्राउ परेका छन्, जुन अघिल्लो राष्ट्रपति जो बाइडेनको समयमा मासिक २५० मात्र थियो। आलोचकहरूले भने यस योजनाले प्रहरीलाई मानव अधिकार हनन र दुर्व्यवहार गर्दा पनि कारबाहीबाट उम्कने बाटो दिने भन्दै चिन्ता व्यक्त गरे। यता, राष्ट्रिय शेरिफ संघका अधिकारीहरूले भने यो योजना सकारात्मक रहेको बताए।