अमेरिकी सेनामा भर्ती हुन हिँडेका दुई किशोरमाथि आइस (ICE) द्वारा हातपात र पक्राउ
टेक्सास- अमेरिकाको टेक्सासस्थित अलामोमा अमेरिकी सेना (मरिन) मा भर्ती हुन गइरहेका दुई जना १७ वर्षीय किशोरलाई अध्यागमन तथा भन्सार प्रवर्तन (आइस) का अधिकारीहरूले कुटपिट गर्दै पक्राउ गरेका छन्। सेप्टेम्बर ११ मा भएको यस घटनामा किशोरहरूले अधिकारीहरूले गरिरहेको अध्यागमन कारबाहीको भिडियो खिच्न लाग्दा उनीहरूमाथि हातपात भएको हो।
सार्वजनिक भएको भिडियोमा सादा पोसाकका अधिकारीहरूले गाडीभित्र रहेका किशोरलाई बाहिर तानेर भुइँमा लडाई हतकडी लगाएको र कुटपिट गरेको देखिन्छ। पक्राउ परेकामध्ये एक लुइस ओचोआले आफूहरूले कुनै प्रतिकार नगर्दा पनि अधिकारीहरूले बिनाकारण पक्राउ गरेको र आफ्नो नाडी भाँचिदिएको बताएका छन्। उनले आफू अमेरिकी नागरिक भएको बताउँदा पनि अधिकारीहरूले बेवास्ता गर्दै आठ घण्टासम्म नियन्त्रणमा राखेको गुनासो गरे। लुइसकी आमाले यो घटना निकै पीडादायी भएको र घण्टौँसम्म छोराको कुनै जानकारी नदिइएको बताइन्।
यता, अमेरिकी आन्तरिक सुरक्षा विभाग (डिएचएस) ले भने ती किशोरहरूले सरकारी काममा बाधा पुर्याएको दाबी गरेको छ। डिएचएसका प्रवक्ताका अनुसार उनीहरूले अधिकारीहरूलाई पछ्याउँदै गाडीको सिसा ढक्ढकाएको र पक्राउ गर्न खोज्दा भौतिक रूपमै आक्रमणमा उत्रिएपछि स्थितिलाई नियन्त्रणमा लिन सामान्य बल प्रयोग गरिएको थियो।
यस घटनालाई लिएर अमेरिकी सांसदहरूले गहिरो चिन्ता व्यक्त गरेका छन्। टेक्सासका सांसद हेनरी कुएलार र भिसेन्टे गोन्जालेजले अधिकारीहरूको यस्तो व्यवहार निन्दनीय भएको भन्दै शक्ति दुरुपयोगको तत्काल छानबिन हुनुपर्ने माग गरेका छन्। पछिल्लो समय अमेरिकामा अध्यागमन अधिकारी र सर्वसाधारणबीच यस्ता विवादहरू बढ्दै गएका छन्।
