आफ्ना पार्किङ स्थलमा अध्यागमन अधिकारीलाई रोक लगाउन न्युयोर्कका डेमोक्र्याटहरूको आग्रह
न्युयोर्कका मेयर जोहरान ममदानी र शीर्ष डेमोक्र्याट नेताहरूले निजी पार्किङ स्थलका मालिकहरूलाई संघीय अध्यागमन अधिकारीहरू (आइसिई) लाई आफ्ना ठाउँहरू प्रयोग गर्न नदिन आग्रह गरेका छन्। गत साता आइसिई अधिकारीहरूको गोली लागेर एक व्यक्ति घाइते भएको घटनापछि उनीहरूले यो आह्वान गरेका हुन्।
शुक्रबार लेखिएको पत्रमा मेयर ममदानी, सिनेटका डेमोक्र्याटिक नेता चक सुमर, हाउसका डेमोक्र्याटिक नेता हकिम जेफ्रिज लगायत दर्जनौं राज्य तथा स्थानीय सांसदहरूले पार्किङ र ग्यारेज मालिकहरूलाई आइसिईको कारबाही (अपरेसन) का लागि आफ्नो सम्पत्ति भाडामा वा प्रयोग गर्न नदिन भनेका छन्।
केही दिन अघि ५ वर्षीय छोरासँगै गाडीमा रहेका २८ वर्षीय डोमिनिकन नागरिक ओस्कार बेल्गललाई आइसिई अधिकारीहरूले पक्राउ गर्ने क्रममा गोली हानेका थिए। उक्त घटना अघि अधिकारीहरूले नजिकैको एउटा निजी पार्किङ स्थललाई आफ्नो तयारी गर्ने ठाउँ (स्टेजिङ एरिया) को रूपमा प्रयोग गरेको पत्रमा उल्लेख छ। यो गोलीकाण्डपछि न्युयोर्कमा विरोध प्रदर्शन हुनुका साथै संघीय सरकारको अध्यागमन कारबाहीमाथि ध्यानाकर्षण भएको छ।
यसैबीच, होमल्यान्ड सेक्युरिटी विभाग (डिएचएस) का प्रवक्ताले यो पत्रको कडा आलोचना गरेका छन्। उनले मेयर ममदानीले सहर सुरक्षित नबनाएकाले काम गरिरहेका सुरक्षा अधिकारीहरूलाई धन्यवाद दिनुपर्ने बताएका छन्। साथै, पार्किङमा रोक लगाउँदैमा गैरकानुनी आप्रवासी अपराधीहरूलाई देश निकाला गर्ने काम नरोकिने पनि डिएचएसले स्पष्ट पारेको छ।
सरकारी अधिकारीहरूले भने ओस्कारले दुई सरकारी गाडीलाई ठक्कर दिएर अधिकारीहरूतर्फ गाडी हुइँक्याएपछि ज्यान जोगाउन गोली चलाएको दाबी गर्दै आएका छन्।
न्युयोर्क सहरले यसअघि नै अदालतको वारेन्ट वा विशेष कानुनी अवस्थाबाहेक डिएचएस जस्ता बाहिरी सुरक्षा एजेन्सीहरूलाई सहरको सरकारी सम्पत्तिमा अखडा बनाउन रोक लगाएको छ। तर, यो नियम निजी पार्किङ र ग्यारेजहरूमा लागू हुँदैन। तसर्थ, नेताहरूले आप्रवासीहरूको पक्षमा उभिँदै निजी क्षेत्रलाई पनि आइसिईलाई असहयोग गर्न आग्रह गरेका हुन्।
