ग्रिन कार्डधारीले मतदान गरेको आरोप, न्युयोर्ककी पूर्व बास्केटबल खेलाडी कानुनी झमेलामा
न्युयोर्क – न्युयोर्क राज्यकी ६६ वर्षीया मार्भा कुकविरुद्ध गैरकानुनी रूपमा मतदान गरेको आरोपमा संघीय मुद्दा दायर गरिएको छ। आगामी मध्यावधि निर्वाचनअघि ट्रम्प प्रशासनले गैर-नागरिक मतदाताहरूमाथि थालेको कारबाहीका क्रममा पक्राउ पर्ने उनी पछिल्लो व्यक्ति हुन्।
सिराक्यूज निवासी कुकले आफूलाई सानैमा धर्मपुत्रीको रूपमा ग्रहण (एडप्ट) गरिएको र आफू सधैँ अमेरिकी नागरिक नै भएको विश्वासमा रहेको अनुसन्धानकर्ताहरूलाई बताएकी छन्। तर, आफ्नी जन्मदिने आमाको खोजी गर्ने क्रममा हालसालै मात्र उनले आफ्नो जन्मदर्ता प्रमाणपत्र जर्मनीको रहेको पत्ता लगाएकी थिइन्।
संघीय अभियोजनकर्ताहरूका अनुसार कुकसँग विगत केही वर्षदेखि ‘ग्रिन कार्ड’ (स्थायी बसोबासको अनुमति) रहेको तर नागरिकता नभएको अवस्थामा पनि उनले हालैका निर्वाचनहरूमा मतदान गरेकी थिइन्। सन् २०२२ को मध्यावधि चुनावमा मतदान गरेको विषयलाई लिएर उनीविरुद्ध विदेशी नागरिक भई मतदान गरेको अभियोग लगाइएको छ।
यो कसुर प्रमाणित भएमा उनलाई अधिकतम एक वर्षको जेल सजाय र १ लाख डलरसम्म जरिवाना हुनुका साथै देश निकाला (डिपोर्ट) समेत हुन सक्ने संघीय कानुनमा व्यवस्था छ।
बुधबार आफैँ प्रहरीसमक्ष उपस्थित भएकी कुकलाई अदालतमा हतकडी र नेल (साङ्लो) लगाइएकोमा उनले दुःख व्यक्त गरेकी छन्। “यो निकै कठिन समय थियो,” उनले भनिन्, “तर मलाई भगवान्मा गहिरो विश्वास छ र समुदायको प्रार्थना तथा समर्थनले मलाई यो परिस्थितिबाट पार लगाउनेछ।”
कुकका वकिल पल टकका अनुसार हाललाई उनको देश निकालासम्बन्धी कुनै प्रक्रिया अघि बढाइएको छैन।
सरकारी वकिलको कार्यालयले कुकको पक्राउलाई राज्यमा “मतदाता जालसाजी व्यापक रहेको” प्रमाणका रूपमा व्याख्या गरेको छ। यद्यपि, प्रशासनकै अध्ययनहरूले यस्ता घटनाहरू अत्यन्तै दुर्लभ हुने र यसले चुनावी नतिजामा असर नपार्ने देखाएका छन्।
पछिल्लो समय क्यालिफोर्नियामा दुई दर्जनभन्दा बढी ग्रिन कार्डधारी र मिनेसोटामा १० जनाविरुद्ध पनि गैरकानुनी मतदान गरेको आरोपमा मुद्दा चलाइएको छ।
सन् १९७९-८० को सिजनमा सिराक्यूज युनिभर्सिटीको महिला बास्केटबल टोलीकी उत्कृष्ट खेलाडी रहेकी कुकलाई स्थानीय समुदायले एक सहयोगी र सम्मानित व्यक्तिका रूपमा चिन्दछन्। उनी स्थानीय चर्च र वाईएमसीए (YMCA) मार्फत न्यून आय भएका परिवार र बालबालिकाको सहयोगमा सक्रिय छिन्।
अल सेन्ट्स चर्चका पास्टर फ्रेड डेली र स्थानीयवासीहरूले कुकले अन्जानमा र बिना कुनै गलत नियत मतदान गरेको भन्दै सरकारको यो कारबाहीप्रति आश्चर्य र असन्तुष्टि व्यक्त गरेका छन्।
