बाढीपहिरो पीडितका लागि शिव र समीक्षाको सांगीतिक सहयोग
न्यूयोर्क- नेपाली गायक शिव परियार र गायिका समीक्षा अधिकारी यतिबेला ‘दशैं–तिहार धमाका यूएसए टुर’ का लागि अमेरिकामा छन्। पी–३ भिसामा त्यहाँ पुगेका उनीहरूले करिब डेढ महिनासम्म विभिन्न राज्यमा सांगीतिक प्रस्तुति दिनेछन्। नेपालमा हालै गएको बाढीपहिरोका कारण उनीहरूले हरेक कार्यक्रमबाट ५ सय डलर प्रधानमन्त्री राहत कोषमा जम्मा गर्ने निर्णय गरेका छन्।
अक्टोबर ४ मा न्युयोर्कको द प्यालेसमा उनीहरूको सांगीतिक कार्यक्रम हुँदैछ। शिवको यो छैटौँ अमेरिका यात्रा हो भने समीक्षा पहिलोपटक अमेरिका पुगेकी हुन्। देशमा विपत्ति परेका बेला आफ्नोतर्फबाट सानो सहयोग गर्न खोजेको शिवले बताए। साथै, समीक्षासँगको सहकार्यले नयाँ पुस्ताको सांगीतिक रुचि बुझ्ने अवसर मिलेको उनले जानकारी दिए।
पछिल्लो समय अमेरिकामा पी–३ भिसामा जाने नेपाली कलाकारको संख्या बढिरहेको छ। यसै सन्दर्भमा, कानुन तथा कर विशेषज्ञहरूले कलाकारलाई भिसाको सर्त कडाइका साथ पालना गर्न सुझाव दिएका छन्। उनीहरूका अनुसार कलाकारले अनुमति पाएको संस्था र स्थानमा मात्र प्रस्तुति दिनुपर्छ, नियम मिचेमा भविष्यको अमेरिका यात्रामा वा भिसामा गम्भीर समस्या आउन सक्छ।
