इन्डोनेसियामा विद्यालय भवन ढल्दा ९१ जनाको मृत्यु, उद्धार कार्य जारी
इन्डोनेसिया- इन्डोनेसियाको मुख्य टापु जाभा स्थित सिडोआरजो सहरको एक इस्लामिक बोर्डिङ स्कूल ढल्दा कम्तीमा ९१ जनाको मृत्यु भएको छ। अधिकारीहरूले अझै धेरै जना भग्नावशेषमुनि फसेको आशङ्का व्यक्त गरेका छन् र उद्धार टोलीहरू अहोरात्र खोजी कार्यमा खटिएका छन्।
स्थानीय प्रतिवेदन अनुसार उक्त विद्यालय सोमबार दिउँसो विद्यार्थीहरू प्रार्थनाका लागि भेला भएको समयमा अचानक भत्किएको थियो। राष्ट्रिय विपद् न्यूनीकरण एजेन्सीका प्रवक्ता अब्दुल मुहारीले बताएअनुसार करिब ९१ जना अझै भवनको भग्नावशेषमुनि गाडिएको आशङ्का गरिएको छ।
अधिकारीहरूले उद्धार कार्यमा प्राथमिकता बाँचेका व्यक्तिमा दिइरहेको र सात वटा क्षेत्रमा जीवनको संकेत पाएको जानकारी दिएका छन्। उद्धार टोलीले भारी मेसिनरी र हातले भग्नावशेष हटाउँदै बाँचेका व्यक्तिहरूलाई जीवितै बाहिर निकाल्ने प्रयास गरिरहेको छ।
भवन ध्वस्त भएपछि अभिभावकहरू नजिकै बसेर आफ्ना छोराछोरीको खोजीमा प्रतीक्षा गरिरहेका छन्। उद्धार टोलीले जीवनरक्षक आपूर्ति पुर्याउँदै उद्धार कार्यमा निरन्तरता दिएको छ।
