अमेरिकाले दोहोरो मापदण्ड अपनाएको चीनको आरोप
राष्ट्रपति ट्रम्पले चीनमाथि थप १०० प्रतिशत कर लगाउने चेतावनी दिएपछि चीनले अमेरिकामाथि “दोहोरो मापदण्ड” अपनाएको आरोप लगाएको छ।
चीनको वाणिज्य मन्त्रालयले आइतबार विज्ञप्ति निकाल्दै भनेको छ, “हरेक पटक करको धम्की दिनु चीनसँग व्यवहार गर्ने सही उपाय होइन।” मन्त्रालयले अमेरिकाले सेप्टेम्बरदेखि नै आर्थिक दबाबका कदम चालेको आरोप पनि लगायो।
ट्रम्पले चीनले दुर्लभ पृथ्वी तत्वहरूमा निर्यात प्रतिबन्ध लगाएको भन्दै शुक्रबार व्यापार युद्ध फेरि तातो बनाएका थिए। उनले नोभेम्बर १ देखि नयाँ कर थप्ने र महत्त्वपूर्ण सफ्टवेयर निर्यातमा पनि नियन्त्रण लगाउने घोषणा गरेका छन्।
यी दुर्लभ तत्वहरू फोन, बिजुली गाडी, हतियार र नवीकरणीय ऊर्जाका उपकरण बनाउनका लागि अत्यावश्यक मानिन्छन्। चीनले यिनको उत्पादन र प्रशोधनमा विश्वभर ठूलो पकड राखेको छ।
अमेरिकाले अहिले चिनियाँ सामानहरूमा ३० प्रतिशत कर लगाइरहेको छ भने चीनले जवाफमा १० प्रतिशत कर लगाएको छ।
पछिल्लो घटनाक्रमपछि ट्रम्पले यस महिनाको अन्त्यतिर दक्षिण कोरियामा हुने एपेक शिखर सम्मेलनमा राष्ट्रपति सीसँगको भेट रद्द गर्ने संकेत पनि दिएका छन्।
यसअघि दुवै देशबीच व्यापार युद्ध रोक्ने सहमति भएको थियो, तर अहिले तनाव फेरि बढ्दै गएको छ।
