ट्रम्पको विश्व पुनःनिर्माण योजनाबाट टाढा हुन सङ्घर्षरत युरोप
लन्डन- अमेरिकी राष्ट्रपति डोनाल्ड ट्रम्पले इजिप्टमा इजरायल–हमासबीच अमेरिकी–मध्यस्थतामा भएको युद्धविराम स्वागत गरेका छन्। तर उनको पछाडि उभिएका विश्व नेताहरू केवल प्रतीकात्मक देखिएका छन्। यो युरोपको घट्दो प्रभावको स्पष्ट संकेत हो।
गाजा युद्धदेखि युक्रेन द्वन्द्वसम्म युरोपले आफ्नो स्थान जोगाउन संघर्ष गरिरहेको छ। तर ट्रम्पले ‘अमेरिका फस्ट’ नीतिअन्तर्गत विश्व राजनीतिलाई फेरि आकार दिन तीव्र प्रयास गरिरहेका छन्। भू–राजनीतिक विज्ञ लिन्डसे न्युम्यान भन्छन्, “ट्रम्पको नीति अब अलगाववादी छैन, उनी आफ्नो छविमा संसार पुनःनिर्माण गर्दैछन्। युरोपले उनलाई असर पार्न सक्ने सम्भावना धेरै कम छ।”
ट्रम्पले रूसी तेल–ग्यास उद्योगमाथि प्रतिबन्ध लगाएका छन्, तर त्यो कदम पुटिनप्रतिको निराशाबाट प्रेरित देखिन्छ। उनले भने, “मैले भ्लादिमिरसँग धेरै कुरा गरेको छु, तर परिणाम धेरै आएको छैन।”
ट्रम्प युक्रेन युद्ध रोक्न अझै सफल भएको छैन। युक्रेनका राष्ट्रपति जेलेन्स्की र पुटिनबीच वार्ता असफल भएपछि उनले युरोपेली नेताहरूलाई सहयोगको आग्रह गरेका थिए। तर युरोप भित्रै मतभेद छ। हङ्गेरीका प्रधानमन्त्री ओर्बनले सहयोग विरोध गरिरहेका छन् भने फ्रान्सका म्याक्रोनले प्रतिबन्धलाई ‘निर्णायक मोड’ भनेका छन्।
इजरायल–हमास युद्धविराममा युरोपको भूमिका न्यून रह्यो। ट्रम्पले इजिप्ट, कतार, टर्की र साउदी अरबको भूमिकाको प्रशंसा गरे तर युरोपको योगदानमा मौन रहे। बेलायत र फ्रान्सले प्यालेस्टिनी राज्यलाई मान्यता दिएकोमा अमेरिकी प्रशासन असन्तुष्ट छ।
विश्लेषक जोनाथन स्चान्जर भन्छन्, “ट्रम्पको युद्धविरामले युरोपेली आलोचनालाई केही समयका लागि शान्त पारेको छ। दुवै पक्षलाई रचनात्मक संवादतर्फ अग्रसर बनाएको छ।”
ट्रम्पले नाटो छोडेका छैनन्, र यूरोपेली सामानमा कर पनि ठूलो नलगाएका छन्, तर देशहरूलाई रक्षा खर्च बढाउन दबाब दिइरहेका छन्। युक्रेन युद्धले युरोपमा सुरक्षा चेतना बढाएको छ।
इतिहासकार क्याथलिन बर्क भन्छन्, “ट्रम्पले बुझ्न थालेका छन्—शत्रुभन्दा सहयोगी हुनु सधैं राम्रो हुन्छ। यदि युरोप एकजुट रह्यो भने उनीहरूको प्रभाव अझ बढ्न सक्छ।”
