मस्कोको पक्ष झुकेको अमेरिकी शान्ति योजनामाथि युक्रेनका सहयोगीहरूको कूटनीतिक दबाब
किएभ- युक्रेनका प्रमुख पश्चिमी सहयोगी राष्ट्रहरूले अमेरिकाद्वारा प्रस्तुत २८ बुँदे शान्ति योजनामा संशोधन गर्न दबाब दिएका छन्। उनीहरूको भनाइमा योजना मस्कोको दीर्घकालीन मागहरूसँग निकट देखिन्छ।
युक्रेनी राष्ट्रपति भोलोदिमिर जेलेन्स्कीले जनताले मातृभूमिको रक्षा गर्ने दृढ प्रतिज्ञा दोहोर्याउँदै सार्वभौमिक अधिकार र अमेरिकी समर्थनबीच कठिन छनोटको जोखिम रहेको बताएका छन्।
फ्रान्स, जर्मनी र बेलायतका प्रतिनिधिमण्डलहरूको समन्वयमा युक्रेनले आइतबार स्विट्जरल्यान्डमा अमेरिकी पक्षसँग प्रत्यक्ष वार्ता गर्ने तयारी गरेको छ। अमेरिकी योजनामा युक्रेनले भूभाग रूसलाई हस्तान्तरण गर्ने, सेनाको आकार घटाउने र नाटो सदस्यता रोक्ने जस्ता मागहरू छन्, जसलाई किएभले बारम्बार अस्वीकार गर्दै आएको छ।
युरोपेली सङ्घ, क्यानाडा र जापानले संयुक्त वक्तव्य जारी गर्दै सीमा बलपूर्वक परिवर्तन अस्वीकार्य हुने र युक्रेनी सेनामा कटौती नहुने स्पष्ट सन्देश दिएका छन्। फ्रान्सेली राष्ट्रपति म्याक्रोन र जर्मन चान्सलर मेर्जले युरोपलाई परामर्शबिना शान्ति प्रक्रिया अघि नबढाउन चेतावनी दिएका छन्।
जेनाभामा अमेरिकी प्रतिनिधिमण्डलसँग हुने बैठकमा सेना सचिव ड्यान ड्रिस्कोल र विदेशमन्त्री मार्को रुबियो सहभागी हुने अपेक्षा गरिएको छ। पश्चिमी राष्ट्रहरूले युक्रेनलाई न्यायसङ्गत समाधानबिनै सम्झौतामा हतार नगर्न आग्रह गरेका छन्।
यसैबीच, युक्रेनले होलोडोमोर मेमोरियल दिवस मनाउँदै सोभियत–कालीन भीषण अनिकालको स्मरण गरेको छ। राष्ट्रपति जेलेन्स्कीले जनताको बलिदान स्मरण गर्दै भने, “हामीले युक्रेनको रक्षा गरेका छौँ, गरिरहेका छौँ र सधैँ गर्नेछौँ। हाम्रो घरमा रूस कहिल्यै मालिक बन्ने छैन।”
