कनेक्टिकटमा रेल दुर्घटना, लिकबाट बाहिरिँएर डिब्बा नदीमा खस्यो
न्युयोर्क – अमेरिकाको कनेक्टिकट राज्यमा आज (बिहीबार) बिहान एउटा ठुलो रेल दुर्घटना भएको छ। म्यान्सफिल्ड भन्ने ठाउँमा गुडिरहेको मालवाहक रेल लिकबाट बाहिर जाँदा त्यसका डिब्बाहरू पल्टिएर नदीसम्म पुगेका छन्।
घटना बिहान करिब ९ बजेतिर भएको हो। ४३ वटा डिब्बा भएको त्यो रेलका १० वटा डिब्बा लिक छोडेर पल्टिएका थिए। जसमध्ये केही डिब्बाहरू नजिकैको विलिमेन्टिक नदीमा खसेका छन्। यो घटनापछि म्यान्सफिल्ड सहरमा ‘स्थानीय आपत्काल’ घोषणा गरिएको छ।
खतरा के छ? सबैभन्दा डरलाग्दो कुरा त के छ भने, पल्टिएका ६ वटा डिब्बामा घर तताउन प्रयोग हुने ‘लिक्विड प्रोपेन’ ग्यास थियो। यस्तै अरू डिब्बामा काठ, अन्न र खाना पकाउने तेल थियो। अधिकारीहरूका अनुसार एउटा डिब्बाबाट करिब २५०० ग्यालन तेल चुहिएको छ, जसलाई अहिले नियन्त्रणमा लिइसकिएको छ। धन्न, अहिलेसम्म ग्यास भने लिक भएको छैन।
घरभित्रै बस्न अनुरोध सुरक्षाका लागि प्रहरीले घटनास्थलको आधा माइल वरपर बस्ने सबैलाई घरभित्रै बस्न आदेश दिएको छ। पल्टिएका डिब्बाहरूलाई उठाउँदा ग्यास लिक हुन सक्ने जोखिम भएकाले यस्तो सावधानी अपनाइएको हो। रुट ३२ सडक शुक्रबारसम्मका लागि बन्द गरिएको छ।
रेलमा भएका चालक र इन्जिनियर सुरक्षित छन्, कसैलाई चोटपटक लागेको छैन। तर, यो सफाइ गर्न अझै केही दिन लाग्ने बताइएको छ। त्यसैले त्यताका स्कुल बसहरूको रुट पनि परिवर्तन गरिएको छ।
