हिउँजस्तो चिसो नदीमा खसेर अग्नि नियन्त्रकको मृत्यु: नियमित जाँच गर्दागर्दै गयो ज्यान
न्युयोर्क- अमेरिकाको न्यू जर्सीमा एउटा दुखद घटना भएको छ। क्याम्डेनस्थित डेलावेयर नदीमा खसेर एक जना अग्नि नियन्त्रकको ज्यान गएको छ। बिहीबार बिहान उनी आफ्नो टिमसँगै ‘फायर बोट’ (आगो निभाउने डुंगा) को नियमित जाँच गर्न गएका बेला यो दुर्घटना भएको हो।
बिहान करिब ११ बजेतिर उनी एक्कासी नदीमा खसेका थिए। क्याम्डेनका फायर चिफ जेसी फ्ल्याक्सका अनुसार, उनलाई पानीबाट बाहिर निकाल्न करिब ३० मिनेट लागेको थियो। त्यतिबेला नदीको पानीको तापक्रम ३५ डिग्री (फेरेनहाइट) मात्र थियो। यति चिसो पानीमा खस्नेबित्तिकै शरीरमा ‘कोल्ड शक’हुन्छ, जसले गर्दा सास फेर्न गाह्रो हुने र हातखुट्टा नचल्ने हुन्छ।
उनलाई तत्काल कुपर युनिभर्सिटी अस्पताल पुर्याइए पनि डाक्टरहरूले बचाउन सकेनन्। क्याम्डेनका मेयर भिक्टर कारस्टारफेनले दिउँसो पत्रकार सम्मेलन गर्दै उनको मृत्युको पुष्टि गरेका छन्। मृतकको नाम नखुलाइए पनि उनी एक अनुभवी अग्नि नियन्त्रक, श्रीमान् र बुबा भएको बताइएको छ। उनका सहकर्मीहरूले उनलाई डुंगासम्बन्धी काममा निकै सिपालु व्यक्तिका रूपमा सम्झिएका छन्। गभर्नर मिकी शेरिलले पनि यो घटनाप्रति गहिरो दुःख व्यक्त गरेकी छिन्।
