‘एलिगेटर अल्काट्राज’ मा पठाइएका आप्रवासीबारे प्यूर्टो रिकोको एसीएलयूको कडा विरोध

न्युयोर्क- प्यूर्टो रिकोको अमेरिकी नागरिक स्वतन्त्रता संघ (ACLU) ले अमेरिकी भूमिमा पक्राउ परेका आप्रवासीहरूलाई फ्लोरिडामा अवस्थित विवादास्पद “एलिगेटर अल्काट्राज” कारागारमा स्थानान्तरण गरिएकोप्रति गम्भीर आपत्ति जनाएको छ।

प्यूर्टो रिकोमा लामो समयसम्म आप्रवासीलाई थुनामा राख्न सक्ने स्थायी केन्द्र नभएकाले, त्यहाँ पक्राउ परेकाहरूलाई प्रायः मुख्यभूमि अमेरिकामा पठाइन्छ। हालसालै प्यूर्टो रिकोबाट पक्राउ परेका केही आप्रवासीलाई ट्रम्प प्रशासनद्वारा एक सातामै बनाइएको उक्त अस्थायी कारागारमा राखिएको खबर बाहिर आएको हो।

प्यूर्टो रिको एसीएलयूकी कार्यकारी निर्देशक अनेट मार्टिनेजले भनिन्, “यो कुनै साधारण थुनुवा केन्द्र होइन, यो त यातना शिविरजस्तै देखिन्छ। यहाँ छिर्दा बाहिर निस्कन सकिँदैन भन्ने पनि भनिएको छ।”

उनले राष्ट्रपति डोनाल्ड ट्रम्पद्वारा थप आप्रवासी थुनुवा केन्द्रहरू बनाउने योजनाको पनि कडा आलोचना गरिन्।

यसै साता, एसीएलयूले अमेरिकी गृहमन्त्रालय (DHS) विरुद्ध मुद्दा दायर गर्दै एलिगेटर अल्काट्राज मा थुनामा रहेका चार आप्रवासीको तर्फबाट संघीय सरकारले उनीहरूलाई कानुनी सहायता पाउनबाट रोक्दै अधिकार हनन गरेको आरोप लगाएको छ।

क्युबाली नागरिक माइकल बोरेगो फर्नान्डेज, जो उक्त कारागारमा बन्दी छन्, ले उजुरीमा आफूलाई र अरू थुनुवालाई “दैनिक नुहाउन नदिइने, खानामा गम्भीर कटौती गरिने, हिंसा र कडा व्यवहार गर्ने गार्डहरूबाट मारपीट हुने, र औषधि सेवा समेत नपाइने” बताए।

DHS की सहसचिव ट्रिसिया म्याकलाफ्लिनले यी आरोपलाई अस्वीकार गर्दै भनिन्, “मानव सभ्यताको इतिहासमै कुनै पनि गैरकानुनी आप्रवासीलाई अमेरिकाले जस्तो राम्रो व्यवहार गरेको छैन।”

हाल एलिगेटर अल्काट्राजमा करिब ७०० आप्रवासीलाई ह्वाइट टेन्टभित्र तारबारले घेरेका खोरजस्ता संरचनामा राखिएको छ। यो ठाउँ गोही र सर्पले भरिएको बाढीको सम्भावना हुने दलदली क्षेत्रमा अवस्थित छ।

पछिल्ला दिनमा यहाँ थुनामा रहेका थुप्रै आप्रवासी र तिनका आफन्तहरूले बिजुलीको अभाव, खानेपानीको संकट, मच्छरको अत्यधिक समस्या, औषधिको पहुँच नहुनु र दिनमा एकपटक मात्रै खाना दिने जस्ता गम्भीर समस्याको उजुरी गरेका छन्।

प्यूर्टो रिकोको ‘एल नुएभो दियास’ नामक पत्रिकासँग कुरा गर्दै, हालै पक्राउ परेका एक डोमिनिकन आप्रवासीले भने, “हामीलाई न खाना पर्याप्त दिइन्छ, न नुहाउने सुविधा छ। औषधि पाउन त सम्भव नै छैन।”

मार्टिनेजले थप भनिन्, “अमेरिकाले आफूलाई लोकतन्त्र र न्यायको प्रतीक भन्दै आएको छ, तर आप्रवासन नीतिको नाममा यस्तो अमानवीय अभ्यास गर्नु दुःखद छ।”

ट्रम्प प्रशासनको ‘बृहत् निर्वासन अभियान’ ले प्यूर्टो रिकोमा लामो समयदेखि रहँदै आएका आप्रवासीहरूका लागि सुरक्षित लाग्ने आश्रयको धारणा नै फेरिएको अधिकारकर्मीहरूको भनाइ छ।