अटलान्टामा आप्रवासन विरोधी प्रदर्शन कभर गर्ने पत्रकार हिरासतमा, परिवारले रिहाइको माग
अटलान्टा — स्पेनिश भाषाका पत्रकार मारियो ग्वेभारालाई गत महिना अटलान्टा नजिकै आप्रवासन विरोधी प्रदर्शन कभर गर्ने क्रममा पक्राउ गरी अहिले संघीय आप्रवासन हिरासतमा राखिएको छ। उनका छोराछोरीले मंगलबार पत्रकारलाई तत्काल रिहा गर्न माग गरेका छन्।
४७ वर्षीय ग्वेभारा जुन १४ मा डेकलब काउन्टीमा ‘नो किङ्स’ नामक प्रदर्शनको प्रत्यक्ष प्रसारण गर्दै गर्दा पक्राउ परेका थिए। केही दिनपछि उनलाई अमेरिकी आप्रवासन र सीमा सुरक्षा निकायको जिम्मा लगाइयो।
हाल उनी जर्जियाको दक्षिणपूर्वी सहर फोल्कस्टनस्थित आप्रवासन हिरासत केन्द्रमा राखिएका छन्, जुन स्थान उनको अटलान्टानिकट बसोबास गर्ने परिवारबाट पाँच घण्टाको दूरीमा पर्छ।
ग्वेभाराका छोरी २७ वर्षीया क्याथरिन ग्वेभाराले पत्रकार सम्मेलनमा भनिन्, “२० वर्षभन्दा बढी समयसम्म म बाबाको समर्पण देख्दै आएकी छु। उनले सधैं उपेक्षित आवाजहरूका लागि काम गरे।”
ग्वेभारा एल साल्भाडोरबाट अमेरिका आएका थिए र लामो समयदेखि अटलान्टामा स्पेनिश भाषी समुदायका लागि पत्रकारिता गर्दै आएका थिए। उनी Mundo Hispanico का पूर्व संवाददाता हुन् र अहिले आफूले स्थापना गरेको डिजिटल मिडिया MG News मार्फत काम गर्दै आएका छन्।
उनका छोरा, २१ वर्षीय ओस्कर ग्वेभारा, जो अहिले MG News का फोटो पत्रकार हुन्, भन्छन्, “बाबा किन बेलाबेलामा रातभर जागा बसेर रिपोर्टिङ गर्थे भन्ने म अहिले बुझ्दैछु।”
ग्वेभाराको हिरासतप्रति नागरिक अधिकारकर्मी, प्रेस स्वतन्त्रता समर्थक र राज्यका सांसदहरूले पनि आपत्ति जनाएका छन्। राज्य सिनेटर जोश म्याकलरेनले भने, “पत्रकारलाई हिरासतमा राख्नु प्रेस स्वतन्त्रतामाथिको ठाडो आक्रमण हो।”
ग्वेभाराका वकिल जियोभानी डियाजका अनुसार, उनीमाथि आप्रवासन अदालतले ७,५०० डलर धरौटी तोकेको थियो, तर सरकारको अपिलपछि त्यसलाई रोकिएको छ। “ग्वेभारा अहिले झट्ट हेर्दा शान्त देखिए पनि मानसिक रूपमा गहिरो चोटमा छन्,” डियाजले बताए।
ICE ले उनी एक चर्चित सार्वजनिक व्यक्ति भएकाले सुरक्षा कारण देखाउँदै एक्लै राखिएको बताएको छ। तर लामो समय एक्लोपन मानसिक रूपमा गाह्रो हुने डियाजको भनाइ छ।
ग्वेभारासँग काम गर्ने अनुमतिपत्र छ र उनको हरियो कार्ड (green card) प्रक्रिया प्रगतिमा रहेको वकिल डियाजले बताए। झण्डै एक दशकअघि उनको पहिलाको आप्रवासन मुद्दा प्रशासनिक रूपमा बन्द गरिएको थियो।
ग्वेभाराको गिरफ्तारीको भिडियोमा उनी प्रेस लेखिएको सुरक्षा भेस्ट लगाइरहेका छन् र शान्त रूपमा अन्य पत्रकारहरूसँग सडक किनारमा उभिएका देखिन्छन्। भिडियोमा उनी अधिकारीलाई “म मिडियाको सदस्य हुँ” भनेर स्पष्ट रूपमा भन्छन्।
उनीमाथि पहिले डेकलब काउन्टीमा गैरकानुनी भेला, प्रहरीलाई बाधा पुर्याउने, र सडकमा अवरोध सिर्जना गरेको आरोप लगाइएको थियो। तर त्यसपछि अभियोजन पक्षले भिडियोमा कुनै पनि आपराधिक गतिविधि नदेखिएकाले जुन २५ मा सबै आरोप फिर्ता लिएको हो।
ग्वेभारालाई रिहा गरिनु पर्ने माग गर्दै उनका परिवार, पत्रकार संगठनहरू र अधिकारकर्मीहरूले दबाब बढाइरहेका छन्। “यो प्रेस स्वतन्त्रताको लडाइँ हो,” उनका वकिल डियाजले भने।
