बिहारका एक बालकले ‘टोकेरै गोमन सर्प मारिदिए’
भारत- भारतको बिहार राज्यको पश्चिम चम्पारण जिल्लास्थित मोहची बनकटवा गाउँमा एक अद्भुत घटना सार्वजनिक भएको छ। जुलाई २४ मा गोविन्द कुमार नामक आठ वर्षीय बालकले विषालु गोमन सर्पले आफूलाई टोक्नेबित्तिकै त्यसलाई दाँतले टोक्दै मारिदिए।
बालककी हजुरआमा मतिसरी देवीका अनुसार गोविन्द घरबाहिर खेलिरहेका बेला सर्पसँग जम्काभेट भएको थियो। उनले सर्प समाते र दाँतले टोके। केही समयमै गोविन्द अचेत भएपछि परिवारले उनलाई तत्काल प्राथमिक स्वास्थ्य केन्द्र हुँदै बेतियास्थित सरकारी अस्पताल पुर्याए।
अस्पतालका चिकित्सक डा. कुमार सौरभले बालकको अनुहार विशेषगरी मुख वरिपरि फुलेको जनाए। संयोगवश, सोही दिन गोमन सर्पले डसेको अर्को बालकलाई पनि अस्पताल ल्याइएको थियो। उपचारपछि अहिले दुवै बालकको अवस्था सामान्य रहेको चिकित्सकले जनाएका छन्।
डा. सौरभका अनुसार गोमन सर्पले डस्दा विष रगतमार्फत फैलिने भएकाले त्यसको असर घातक हुन्छ, जसले स्नायुप्रणालीमा असर पुर्याएर मृत्यु समेत गराउन सक्छ। तर मानिसले सर्पलाई टोकेको अवस्थामा विष पाचन प्रणालीमा जान्छ, जहाँ शरीरले त्यसलाई निस्क्रिय बनाउन सक्छ। यद्यपि, मुख वा पाचन नलीमा गहिरो घाउ भए विषले असर गर्न सक्ने बताइन्छ।
भारतमा सर्पदंशका घटनाहरू व्यापक छन्। झण्डै ३०० सर्प प्रजातिमध्ये ६० विषालु छन् र गोमन तीमध्ये एक हो। वर्षा याममा सर्पदंशका घटनामा वृद्धि हुने गर्छ। डब्ल्यूएचओका अनुसार विश्वमा वार्षिक ८१,००० देखि १,३८,००० मानिस सर्पदंशका कारण ज्यान गुमाउँछन्, जसमा भारतमा मात्र वार्षिक सरदर ५८,००० मृत्यु हुने गर्छ।
यो अनौठो तर गम्भीर घटनाले सर्पसँगको साक्षात्कार कति खतरनाक हुनसक्छ भन्ने कुरालाई पुनः उजागर गरेको छ।
