युक्रेनको स्वतन्त्रता दिवसमा राष्ट्रपति जेलिन्स्की : “अझै जितेका छैनौं, तर हार पनि मानेका छैनौं”
न्युयोर्क- युक्रेनले स्वतन्त्रता दिवस मनाउँदै गर्दा राष्ट्रपति भ्लादिमिर जेलिन्स्कीले राष्ट्रलाई सम्बोधन गर्दै रूसविरुद्धको लडाइँ जारी रहने बताएका छन्।
“हामीलाई चाहिएको शान्ति न्यायपूर्ण शान्ति हो, जहाँ हाम्रो भविष्य हाम्रो आफ्नै हातले निर्धारण हुनेछ,” उनले भने।
यसैबीच, रूसले युक्रेनी ड्रोन आक्रमणका कारण कुर्स्कस्थित आणविक ऊर्जा केन्द्रमा आगलागी भएको दाबी गरेको छ। आगो निभाइसकिएको र विकिरण स्तर सामान्य रहेको जनाइएको छ।
किएभमा आयोजित समारोहमा क्यानडाका प्रधानमन्त्री मार्क कार्नी र अमेरिकी दूत कीथ केलेगले सहभागिता जनाए। कार्नीले “क्यानडा सधैं युक्रेनसँग काँधमा काँध मिलाएर उभिने” प्रतिवद्धता व्यक्त गरे। केलेगलाई यस अवसरमा ‘अर्डर अफ मेरिट’ सम्मान प्रदान गरिएको थियो।
बेलायती राजा चार्ल्सले युक्रेनी जनताको “अटूट आत्मा”प्रति प्रशंसा व्यक्त गर्दै पत्र पठाएका छन्। बेलायतले २०२६ सम्म युक्रेनी सैनिकलाई तालिम दिने कार्यक्रम (Operation Interflex) विस्तार गर्ने घोषणा गरेको छ।
नर्वेले करिब ७ अर्ब क्रोनर बराबरको वायु रक्षा प्रणाली सहयोग गर्ने जनाएको छ भने स्वीडेनले युक्रेनसँग संयुक्त रक्षा उत्पादन गर्ने सम्झौता गरेको छ।
यसैबीच, रूसले डोनेत्स्क क्षेत्रमा दुई गाउँ नियन्त्रणमा लिएको दाबी गरेको छ। सन् २०२२ को फेब्रुअरीमा सुरु भएको आक्रमणपछि रूसी सेनाले करिब २०% युक्रेनी भूभाग कब्जा गरिसकेको छ।
गत १५ अगस्टमा अलास्कामा अमेरिकी राष्ट्रपति डोनाल्ड ट्रम्प र रूसी राष्ट्रपति भ्लादिमिर पुटिनबीच भेटवार्ता भए पनि शान्ति सम्झौता नभएकोप्रति ट्रम्पले असन्तुष्टि जनाएका छन्। उनले रूसमाथि थप आर्थिक प्रतिबन्ध वा भन्सार शुल्क लगाउने चेतावनी दिएका छन्।
जेलिन्स्कीले भने निरन्तर युद्धविरामको माग गर्दै आए पनि रूसी विदेश मन्त्री सेर्गेई लावरोभले “समिटका लागि कार्यसूची नै तयार छैन” भन्दै पुटिन–जेलिन्स्की भेट सम्भव नभएको बताएका छन्।
