क्रोएसियामा भीषण आँधी र हिमपात: जनजीवन प्रभावित, रेल दुर्घटना
जाग्रेब– क्रोएसियामा बिहीबार र शुक्रबार आएको शक्तिशाली आँधीले ठूलो विनाश मच्चाएको छ। १२० किलोमिटर प्रतिघण्टाको रफ्तारमा चलेको हावाहुरी र भारी हिमपातका कारण दक्षिण युरोपेली यो देशको जनजीवन अस्तव्यस्त बनेको छ।
आँधीका कारण धेरै मानिस घाइते भएका छन् भने भौतिक पूर्वाधारमा व्यापक क्षति पुगेको छ। राजधानी जाग्रेबमा अवस्था सबैभन्दा खराब देखिएको छ। त्यहाँ तीव्र गतिको हावाले रूखहरू ढाल्नुका साथै घरका छतहरू उडाएको छ। आन्तरिक मन्त्री डाभोर बोजिनोभिकका अनुसार आपतकालीन टोलीहरूले घाइतेहरूको उद्धार र अवरुद्ध सडकहरू खुलाउने काम गरिरहेका छन्।
उत्तरी क्रोएसियामा हावाहुरीकै कारण रेल दुर्घटना समेत भएको छ। रेलको लिकमा रूख ढलेपछि गुडिरहेको रेल ट्र्याकबाट बाहिर निस्कँदा दुई जना घाइते भएका छन्। शक्तिशाली आँधीले ट्राफिक र सार्वजनिक सेवाहरूमा पूर्ण रूपमा अवरोध पुर्याएपछि अधिकारीहरूले सतर्क रहन आग्रह गरेका छन्।
