भुटानमा हिमताल फुट्यो: तातोपानी कुण्ड र सडक बगायो, भारतमा पनि सतर्कता
भुटानको उत्तरी गासा जिल्लामा रहेको सिन्टाफु हिमताल फुटेर आएको बाढीले प्रसिद्ध तातोपानी कुण्ड बगाएको छ। बाढीका कारण पुनाखा–गासा राजमार्गको झण्डै ३२ किलोमिटर सडक पूर्ण रूपमा भत्किएको छ। बाटो बगेपछि अहिले त्यस क्षेत्रमा गाडी चलाउन रोक लगाइएको छ।
बिहीबार साँझ हिमताल फुटेर बाढी बस्तीतिर पसेको थियो। बाढीको जोखिम बढेपछि खतराको साइरन बजाएर स्थानीयलाई सुरक्षित ठाउँमा सारिएको छ। शुक्रबार बिहानसम्म मानिसको ज्यान गएको खबर नआएको अधिकारीहरूले बताएका छन्। अहिले क्षतिको विवरण सङ्कलन गर्ने र जोखिमको अवस्था हेर्ने काम भइरहेको छ।
यस हिमतालको पानी बगेर भारतसम्म पुग्ने भएकाले भारतको पश्चिम बङ्गाल र असममा पनि विशेष सतर्कता अपनाइएको छ। सिन्टाफु ताललाई भुटानका जोखिमयुक्त १७ वटा हिमतालको सूचीमा राखेर पहिलेदेखि नै मेसिन जडान गरी निगरानी गरिँदै आइएको थियो।
