इरानका ‘एकाध लक्ष्य’ नियन्त्रणमा लिन बाँकी, थप आक्रमण १० मिनेटमै सम्भव : ट्रम्प
न्युयोर्क- अमेरिकी राष्ट्रपति डोनाल्ड ट्रम्पले इरानको अधिकांश सैन्य र आणविक क्षमता अमेरिकाले नष्ट गरिसकेको दाबी गर्दै बाँकी रहेका एक–दुई लक्ष्यलाई १० मिनेटभित्रै निस्तेज पार्न सक्ने चेतावनी दिएका छन्।
शनिबार फ्लोरिडास्थित आफ्नो निवासमा पत्रकारहरूसँग कुरा गर्दै ट्रम्पले इरानको ‘पिक्याक्स माउन्टेन’ जस्ता संदिग्ध भूमिगत आणविक परिसरलाई छिट्टै नियन्त्रणमा लिन सकिने बताए। यद्यपि, उनले अमेरिका थप आक्रामक कारबाही गर्न हतारमा नरहेको र युद्ध अन्त्यका लागि भइरहेको वार्ता अघि बढिरहेको जानकारी दिए। अमेरिकी विदेश मन्त्री मार्को रुबियोले पनि ट्रम्पले इरानमा नयाँ आक्रमणको निर्णय गरिनसकेको र अमेरिका कूटनीतिक समाधानका लागि खुला रहेको स्पष्ट पारेका छन्।
अर्कोतर्फ, इरानले सम्भावित आक्रमणको कडा जवाफ दिने चेतावनी दिएको छ। इरानका सर्वोच्च नेता मोज्ताबा खामेनीले उच्च सैन्य कमाण्डरहरूलाई आफ्ना लक्ष्य सूची अद्यावधिक गर्न र अमेरिका तथा इजरायलका सबै प्रकारका सम्पत्तिलाई निशाना बनाउन सक्ने गरी तयारी गर्न आदेश दिएका छन्। इरानी सेनाका प्रवक्ता मोहम्मद अक्रामिनियाले शत्रुता पुनः सुरु भएमा युद्धको दायरा फराकिलो हुने र कुनै भौगोलिक ‘सिमारेखा’ नरहने चेतावनी दिएका छन्।
युद्धलाई थप भड्किन नदिन कतार र पाकिस्तानको मध्यस्थतामा नयाँ कूटनीतिक प्रयास भइरहेका छन्। अमेरिकी उपराष्ट्रपति जेडी भान्सले इरानी सुरक्षा प्रमुख मोहसेन रेजाईलाई नयाँ प्रस्तावसहितको पत्र पठाएका छन्। रेजाईले अमेरिकी पक्षको ‘स्वर परिवर्तन’ भएको र यसलाई राम्रो सङ्केत माने पनि कुल सम्पत्ति फुकुवा लगायतका आफ्ना सर्तहरू पूरा नभएसम्म हर्मुज जलमार्गमा लगाइएको नाकाबन्दी नहटाउने अडान राखेका छन्।
युद्ध सुरु भएदेखि इरानले हर्मुज जलमार्गमा जहाज आवागमनमा लगाएको प्रतिबन्धका कारण विश्व बजारमा इन्धन आपूर्ति प्रभावित भएको छ, जसले गर्दा विश्वव्यापी रूपमा ऊर्जा तथा तेलको मूल्यमा उछाल आएको छ। अमेरिका र इजरायलको पछिल्लो चुनावी नतिजा तथा नयाँ बन्ने सरकारको नीतिले यो द्वन्द्वको आगामी दिशा तय गर्ने अनुमान गरिएको छ।
