राष्ट्रपतिद्वारा संसद्को दुवै सदनको अधिवेशन आह्वान
काठमाडौँ— राष्ट्रपति रामचन्द्र पौडेलले सङ्घीय संसद्को दुवै सदनको अधिवेशन आह्वान गरेका छन्। मन्त्रिपरिषद्को सिफारिसमा उनले यही चैत १९ गते बिहीबार दिउँसो २ बजेका लागि बैठक बोलाएका हुन्।
नेपालको संविधानको धारा ९३ को उपधारा (१) बमोजिम यो अधिवेशन आह्वान गरिएको राष्ट्रपतिको कार्यालयका प्रवक्ता रितेशकुमार शाक्यले जानकारी दिए। सोमबार बसेको मन्त्रिपरिषद् बैठकले अधिवेशन बोलाउन राष्ट्रपतिसमक्ष सिफारिस गर्ने निर्णय गरेको थियो।
यसअघि पनि विभिन्न राजनीतिक घटनाक्रमका कारण संसद्को भूमिका महत्त्वपूर्ण मानिँदै आएको छ। यस पटकको अधिवेशनमा सरकारले ल्याउने नयाँ विधेयक र समसामयिक विषयमा छलफल हुने अपेक्षा गरिएको छ।
