नयाँ वर्ष २०८३: राष्ट्रपति, उपराष्ट्रपति र प्रधानमन्त्रीद्वारा देश निर्माणमा जुट्न आह्वान
नयाँ वर्ष २०८३ को अवसरमा राष्ट्रपति, उपराष्ट्रपति र प्रधानमन्त्रीले स्वदेश तथा विदेशमा रहेका सम्पूर्ण नेपालीलाई शुभकामना दिएका छन्। उनीहरुले सबैको सुख, शान्ति र समृद्धिको कामना गर्दै एकजुट भएर देश निर्माणमा लाग्न आह्वान गरेका छन्।
राष्ट्रपति रामचन्द्र पौडेलले नयाँ वर्षलाई साझा राष्ट्रिय लक्ष्य तय गर्ने र त्यसलाई पूरा गर्ने अवसरको रूपमा लिनुपर्ने बताए। भर्खरै नयाँ सरकार बनेको बताउँदै उनले जनताले खोजेको सुशासन, दिगो शान्ति र विकासका काममा ध्यान दिनुपर्ने कुरामा जोड दिए। उनले सङ्घीय लोकतान्त्रिक गणतन्त्रको मूल्य मान्यतालाई मान्दै सुशासन र सामाजिक न्यायलाई केन्द्रमा राखेर अघि बढ्नुपर्ने बताए।
यसैगरी, उपराष्ट्रपति रामसहायप्रसाद यादवले नयाँ वर्षलाई सकारात्मक सोच र अनुशासित जीवनशैलीको सुरुवात गर्ने अवसर मान्न आग्रह गरे। उनले आर्थिक विकास, शिक्षा, स्वास्थ्य र वातावरण संरक्षणमा सबै मिल्नुपर्ने बताए। तराई–मधेसमा मनाइने सतुवाइन, जुडशीतल, सिरुवा पावनी र काठमाडौं उपत्यकाको बिस्का जात्रा जस्ता पर्वले सामाजिक सद्भाव बढाउने उनले बताए।
प्रधानमन्त्री बालेन्द्र साहले सम्पूर्ण नागरिकको सुख, शान्ति र स्वास्थ्यको कामना गरेका छन्। उनले ‘सर्वे भवन्तु सुखिनः…’ भन्ने संस्कृतको श्लोक राख्दै सबैको जीवनबाट दुःख हटोस् र भलो होस् भन्ने चाहना व्यक्त गरेका छन्।
यसका साथै, मंगलबार नयाँ वर्षको पहिलो दिन अन्य राजनीतिक दलका नेता, पूर्वराष्ट्रपति, पूर्वप्रधानमन्त्री र मन्त्रीहरुले पनि शुभकामना दिँदै राष्ट्रिय एकता र विकासका लागि मिलेर काम गर्न आग्रह गरेका छन्।
