पोल्यान्डमा शरण नपाउँदा अफगान आप्रवासीलाई देश निकालाको डर

न्युयोर्क- पोल्यान्डमा रहेका अफगान आप्रवासीहरूलाई जबरजस्ती तालिवान शासित अफगानिस्तान फर्काइने डर बढेको छ। पोल्यान्डले गत वर्षदेखि शरण माग्ने अधिकारमा रोक लगाएपछि उनीहरूको चिन्ता थपिएको हो।

बेलारुसको सीमा हुँदै गैरकानुनी रूपमा आउनेहरूलाई रोक्न पोल्यान्डले सन् २०२५ को मार्चमा यो कडा नियम ल्याएको थियो। तर, मानव अधिकारकर्मीहरूका अनुसार अधिकारीहरूले यो नियमको दुरुपयोग गरिरहेका छन्। बेलारुस हुँदै आएको आधारमै उनीहरूले देशको जुनसुकै ठाउँमा भेटिएका अफगानहरूलाई पनि शरण माग्न दिएका छैनन्।

हिरासतमा रहेका एक अफगान युवाले तालिवानले आफ्ना बुबाको हत्या गरेको र आफूलाई पनि कुटपिट गरेको बताए। तर, पोल्यान्डका अधिकारीहरूले आफ्नो कुरा नसुनी देश निकाला गर्न लागेको उनले गुनासो गरे। रुस र बेलारुसले जानीजानी आप्रवासी पठाएर आफ्नो देशमा अस्थिरता ल्याउन खोजेको पोल्यान्डको दाबी छ।

युरोपेली मानव अधिकार परिषद् र सीमा नियमन गर्ने निकाय फ्रन्टेक्सले पनि पोल्यान्डले प्रक्रिया पूरा नगरी मानिस फर्काइरहेको भन्दै चिन्ता जनाएका छन्। अहिले पोल्यान्डको हिरासतमा करिब १२० जना अफगान छन्। तीमध्ये धेरैले यसअघि अमेरिका र नेटो सेनासँग मिलेर काम गरेका थिए। उनीहरूलाई अफगानिस्तान फर्काउँदा ज्यानको गम्भीर खतरा हुने अधिकारकर्मीहरूले बताएका छन्।