अमेरिकी सहयोग रोकिएपछि भोकभोकै मर्नुपर्ने अवस्था, पूर्व कार्यकर्ता यौन व्यवसायमा
काठमाडौं- नेपालमा एचआईभी रोकथामको क्षेत्रमा काम गर्दै आएका सयौं स्वास्थ्य कार्यकर्ताले रोजगारी गुमाएका छन्। अमेरिकी सहयोग नियोगले दिँदै आएको आर्थिक सहयोग एक्कासि रोकेपछि उनीहरूको काम खोसिएको हो। काम गुमेपछि उनीहरू भोकै बस्नुपर्ने अवस्थामा पुगेका छन्।
बाँच्नका लागि अरु कुनै विकल्प नभएपछि उनीहरूमध्ये धेरैजना यौन व्यवसायमा फर्कन बाध्य भएका छन्। यसअघि एचआईभी सङ्क्रमणविरुद्धको अभियानमा खटिएका पारालिङ्गी र सीमान्तकृत समुदायका कर्मचारीहरू यसबाट सबैभन्दा बढी मारमा परेका छन्। आफ्नो ज्यान पाल्न र दैनिकी चलाउन नसकेपछि उनीहरूले बाध्य भएर यो बाटो रोजेको बताए।
यी कार्यकर्ताले गाउँगाउँ र सहरका जोखिममा परेका समूहलाई कन्डम बाँड्ने, रगत परीक्षण गर्न सघाउने र जनचेतना जगाउने काम गर्थे। उनीहरूले काम छाड्न पर्दा नेपालको एचआईभी रोकथाम अभियानमा पनि ठूलो धक्का लागेको छ। जोखिममा रहेका समुदायसम्म पुग्ने पुल नै भत्किएको स्वास्थ्य क्षेत्रका जानकारहरूले बताए।
रोजगारी गुमाएका एक पूर्व कर्मचारीले भने, “सहयोग काटिएपछि हाम्रो हातमुख जोड्ने बाटो नै बन्द भयो। भोकै मर्नुभन्दा ज्यान पाल्न जेसुकै काम गर्नुपर्ने बाध्यता आइलाग्यो।” विदेशी सहयोगमा भर परेका यस्ता कार्यक्रम बन्द हुँदा सीमान्तकृत समुदायको जीवन झनै ठूलो सङ्कटमा परेको छ।
