न्युयोर्कमा ठक्कर दिएर भाग्ने हुलाक गाडीका चालक पक्राउ, अर्का फरार चालकको खोजी जारी
न्युयोर्क- न्युयोर्कस्थित हेल्स किचन क्षेत्रमा एक व्यक्तिलाई ठक्कर दिएर भाग्ने अमेरिकी हुलाक सेवाका गाडी चालक पक्राउ परेका छन्। यस्तै, ब्रोंक्समा भएको अर्को यस्तै दुर्घटनाका फरार चालकको प्रहरीले खोजी गरिरहेको छ।
न्युयोर्क प्रहरीका अनुसार पक्राउ पर्नेमा ६१ वर्षीय जेम्स सिमन्स छन्। शनिबार बिहान साढे ५ बजे बाटो काट्दै गरेका ६६ वर्षीय एक पुरुषलाई हुलाकको गाडीले ठक्कर दिएको थियो। अस्पताल पुर्याइएका ती व्यक्तिको मृत्यु भएको छ। हुलाक सेवाका प्रवक्ता जेभियर हर्नान्डेजले घटनाप्रति दुःख व्यक्त गर्दै प्रहरी अनुसन्धानमा पूर्ण सहयोग गरिरहेको बताए।
उता, ब्रोंक्समा शनिबार बिहान ४ बजेतिर अर्को दुर्घटना भएको छ। झगडापछि सडकमा बेहोस अवस्थामा लडिरहेका एक पुरुषलाई सेतो रङको बिएमडब्लु गाडीले ठक्कर दिएर भागेको प्रहरीले जनाएको छ।
पहिलो गाडीले ठक्कर दिएको करिब १० मिनेटपछि सडकमै लडिरहेका ती व्यक्तिलाई गस्तीमा रहेको प्रहरीको गाडीले समेत कुल्चिएको थियो। प्रहरी अधिकारीले तत्काल उद्धारको प्रयास गरे पनि अस्पतालमा उनको ज्यान गयो। भागेका चालक सुरुको झगडामा संलग्न थिए वा थिएनन् भन्ने स्पष्ट नभएको र उनको खोजी भइरहेको प्रहरीले जनाएको छ।
