न्युयोर्कका सबवे स्टेसन चिसो बनाउन नयाँ योजना: गर्मी तानेर जाडोमा भवन तताइने

न्युयोर्क- न्युयोर्क सहरका अत्यधिक गर्मी हुने सबवे स्टेसनहरूलाई चिसो बनाउन नयाँ योजना अघि सारिएको छ। महानगर यातायात प्राधिकरण (एमटिए) ले गर्मी याममा स्टेसनमा जम्मा हुने तापलाई तानेर जाडो याममा वरपरका भवन तताउन प्रयोग गर्ने परीक्षण सुरु गरेको छ।

मेयर जोहरान मम्दानीले ‘चेम्बर अफ हरर्स’ भनेर चिनिने चेम्बर्स स्ट्रिट स्टेसनबाट यो विज्ञान प्रयोगसहितको योजना सुरु गरे। यसका लागि ८ लाख डलर खर्च गरेर थर्मल ऊर्जाको अध्ययन गरिनेछ। एमटिएका अध्यक्ष जान्नो लिबरले स्टेसनमा धेरै प्रवेशद्वार र निकास हुने भएकाले त्यहाँ साधारण एसी जडान गर्न सम्भव नभएको बताए। त्यसैले, स्टेसनको अत्यधिक तापलाई तानेर भण्डारण गरी त्यहाँको तापक्रम केही डिग्रीले घटाउने लक्ष्य राखिएको छ।

यसरी निकालिएको तापलाई प्रयोगविहीन चेम्बर्स स्ट्रिट प्लेटफर्ममुनि भण्डारण गरिनेछ। उक्त तापलाई जाडो याममा नजिकैका सरकारी कार्यालय र भवनहरू तताउन प्रयोग गरिनेछ। यसबाट डिन्किन्स म्युनिसिपल भवन जस्ता कार्यालयको जाडोयामको १५ लाख डलरको हिटर खर्च जोगिने अधिकारीहरूले बताए।

सार्वजनिक वकालतकर्ता जुमाने विलियम्सले यसलाई समस्यालाई स्रोतमा बदल्ने राम्रो अवसर भने। अधिकारीहरूले सन् २०२७ सम्ममा यो योजनालाई पूर्ण रूपमा सञ्चालनमा ल्याउने लक्ष्य राखेका छन्।