नेभाडाको रेनोमा भयानक आगलागी: हजारौं मानिस घर छोड्न बाध्य

न्युयोर्क- अमेरिकाको नेभाडा राज्यस्थित रेनो सहरमा मानिसको लापरबाहीका कारण सुरु भएको आगलागी तीव्र रूपमा फैलिएको छ। अधिकारीहरूले बताए अनुसार यो आगो अहिलेसम्म अलिकति पनि नियन्त्रणमा आउन सकेको छैन। ज्यानको खतरा बढेपछि ४२ हजारभन्दा बढी बासिन्दालाई तत्काल घर छोड्न आदेश दिइएको छ। यसबाहेक अन्य ४५ हजार मानिसलाई सुरक्षित ठाउँमा जान तयार रहन भनिएको छ।

हावाको दिशा छिनछिनमा बदलिरहेकोले आगो निभाउन गाह्रो भएको अधिकारीहरूले बताए। १३ हजार एकड जमिनमा फैलिएको यो आगोले थुप्रै घरहरू जलेर नष्ट भएका छन्। यस घटनामा तीन जना सर्वसाधारण र तीन जना उद्धारकर्मी गरी छ जना घाइते भएका छन्। वासो काउन्टीका करिब १० हजार घरमा बिजुली काटिएको छ भने मुख्य राजमार्ग र विमानस्थलका केही सेवाहरू पनि बन्द गरिएका छन्।

नेभाडाका गभर्नर जो लोम्बार्डोले आपतकालीन अवस्था घोषणा गर्दै उद्धारका लागि थप सुरक्षा बल खटाएका छन्। आगो त्यहाँको विश्वविद्यालय नजिकै पुगेको छ। ज्यान जोगाएर भागेका स्थानीय बासिन्दाहरूले आफ्ना सबै सामान जलेर खरानी भएको बताए। सुक्खा मौसम र कडा हावाहुरीले गर्दा आगो झन् भयंकर बन्दै गएको छ। अहिले आगो निभाउन ४०० भन्दा बढी सुरक्षाकर्मीहरू खटिएका छन्।