न्युयोर्कको पसलमा लुटपाट: ग्राहकलाई गोली हानी नगद लिएर लुटेरा फरार
न्युयोर्क- न्युयोर्कको ब्रोन्क्स क्षेत्रमा रहेको एक पसलमा मंगलबार मध्यरातपछि एक हतियारधारीले ग्राहकलाई गोली हानेर नगद लुटेका छन्।
इस्ट १४९ सडकमा रहेको उक्त पसलमा भएको घटनामा ३३ वर्षीय एक ग्राहकको छातीमा गोली लागेको छ। घाइतेलाई तत्काल अस्पताल लगिएको छ र उनको अवस्था खतरामुक्त रहने प्रहरीले बताए। घटनामा अन्य कोही पनि घाइते भएका छैनन्।
पसलको सुरक्षा क्यामेरामा कैद भएको भिडियोमा दुईजना ग्राहक पसलमा रहेको बेला एक्कासी एक व्यक्तिले हतियार निकालेर झोला बोकेका ग्राहकलाई गोली हानेको देखिन्छ। त्यसपछि ती व्यक्तिले पसलको गल्लाबाट पैसा निकाले र घाइतेको झोलाबाट पनि केही सामान झिकेर भागे। पसलबाट कति रकम लुटियो भन्ने अझै स्पष्ट भएको छैन।
प्रहरीका अनुसार फरार व्यक्तिले मरुन रङको बाक्लो स्विटर, खैरो पाइन्ट र सेतो जुत्ता लगाएका थिए। घटनामा संलग्न कोही पनि अहिलेसम्म पक्राउ परेका छैनन् र प्रहरीले आक्रमणकारीको तीव्र खोजी गरिरहेका छन्।
