टाइम्स स्क्वायरमा चक्कु प्रहार: एकको मृत्यु, प्रहरीको गोलीबाट आक्रमणकारी महिलाको पनि ज्यान गयो
न्युयोर्क- अमेरिकाको न्युयोर्कस्थित व्यस्त बजार टाइम्स स्क्वायरमा एक महिलाले चक्कु प्रहार गर्दा एक जनाको मृत्यु भएको छ भने एक पुरुष घाइते भएका छन्। घटनापछि प्रहरीले चलाएको गोली लागेर आक्रमण गर्ने महिलाको पनि मृत्यु भएको छ।
न्युयोर्क प्रहरी प्रमुख जेसिका टिस्चले बताएअनुसार क्वीन्समा बस्ने ४९ वर्षीया पामेला सिस्नेरोसले सोमबार दिउँसो यो आक्रमण गरेकी हुन्। मानसिक सन्तुलन गुमाएकी उनले रातो झोलाबाट दुईवटा ठूला चक्कु निकालेर सडक पार गर्न लागेका ६८ वर्षीय पुरुषलाई हानेकी थिइन्। त्यसको करिब २० सेकेन्डपछि अगाडि बढेर उनले ३२ वर्षीया अर्की महिलाको पेटमा चक्कु प्रहार गरिन्। घाइते दुवैलाई बेलेभ्यु अस्पताल लगिएकोमा महिलाको मृत्यु भयो भने पुरुषको उपचार भइरहेको छ।
आक्रमणपछि ती महिला दुवै चक्कु बोकेर प्रहरी भएको ठाउँतिर गएकी थिइन्। प्रहरीले उनलाई चक्कु फाल्न करिब ४ मिनेटसम्म सम्झाए पनि उनले मानिनन्। उल्टै प्रहरीलाई नै मार्ने धम्की दिएपछि अधिकारीहरूले सुरुमा बिजुलीको झट्का दिने हतियार प्रयोग गरेका थिए। त्यसले पनि काम नगरेपछि उनी आक्रमण गर्ने उद्देश्यले अघि बढ्दा दुई जना प्रहरी अधिकारीले गोली चलाए। गोली लागेर घाइते भएकी पामेलाको अस्पतालमा मृत्यु भयो।
प्रहरी प्रमुख टिस्चले यो आक्रमण विनाकारण र अचानक भएको बताइन्। प्रहरीका अनुसार आक्रमणकारी महिलाको विगतमा आपराधिक रेकर्ड थिएन तर सन् २०१८ देखि नै उनीमा मानसिक स्वास्थ्य समस्या रहेको रेकर्ड भने प्रहरीसँग थियो।
मेयर जोहरान ममदानीले घटनाप्रति दुःख व्यक्त गर्दै पीडित परिवारप्रति समवेदना प्रकट गरे। न्युयोर्कमा यो वर्ष अपराधका घटना घटे पनि टाइम्स स्क्वायर क्षेत्रमा भएको यो दोस्रो हत्या हो। यसअघि गत मे महिनामा पनि यही क्षेत्रमा एक जनाको चक्कु प्रहार गरी हत्या भएको थियो।
