भोटेकोशी-त्रिशूली बाढी: मृतकको संख्या १३४२ पुग्यो, सुरुङभित्रै पसेर खोजी गर्दै उद्धार टोली
काठमाडौं- रसुवाको भोटेकोशी र त्रिशूली करिडोरमा भदौ १० गते आएको भीषण बाढीमा परी ज्यान गुमाउनेको संख्या १ हजार ३ सय ४२ पुगेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणकी प्रवक्ता शान्ति महतले आइतबार यीमध्ये ९८ जनाको पहिचान भई शव परिवारलाई जिम्मा लगाइएको बताइन्।
अहिले नेपाली सेना, प्रहरी, सशस्त्र प्रहरी र अन्तर्राष्ट्रिय विज्ञसहितको टोलीले खोजी कार्य तीव्र पारेको छ। बाढीले क्षति पुर्याएका विभिन्न जलविद्युत आयोजनाका सुरुङभित्रै पसेर उद्धार टोलीले बेपत्ताको खोजी गरिरहेको छ। उद्धारकर्मीहरू त्रिशूली–३ ए, त्रिशूली–३ बी, रसुवागढी, लाङटाङ, चिलिमे र अपर त्रिशूली १ का सुरुङभित्र धेरै भित्रसम्म पुगेर काम गरिरहेका छन्। यसका साथै, प्रहरीले ड्रोन उडाएर खोला किनारको अवस्था हेर्दै खोजी कार्यलाई थप सहज बनाइरहेको छ।
भेटिएका धेरै शव चिन्न नसकिने अवस्थामा भएकाले पहिचान गर्न आफन्तको डीएनए परीक्षण गर्ने काम धमाधम भइरहेको छ। हराइरहेका विदेशी पर्यटक र उनीहरूका आफन्तलाई सहयोग गर्न पर्यटक प्रहरी पनि खटिएका छन्। विपद्पछिको उद्धार र राहतको कामलाई प्रभावकारी बनाउन मन्त्रीहरूसहित सरोकारवाला निकायको बैठक बसेर सबै संयन्त्रलाई सक्रिय रूपमा परिचालन गरिएको प्राधिकरणले जनाएको छ।
