चीनका दुर्लभ खनिज प्रतिबन्धमा जी–७ को एकजुट प्रतिक्रिया आवश्यक : जापानी अर्थमन्त्री
वासिङ्टन – जापानका अर्थमन्त्री कात्सुनोबु कातोले चीनले लगाएका दुर्लभ पृथ्वी (खनिज) तत्व निर्यात प्रतिबन्धका विरुद्ध सात राष्ट्रको समूह (जी–७) एकताबद्ध भएर कदम चाल्नुपर्ने बताएका छन्।
बिहीबार वाशिङ्टनमा पत्रकार सम्मेलन गर्दै उनले भने, “गत हप्ता चीनले घोषणा गरेको दुर्लभ खनिजको निर्यात प्रतिबन्धबारे जापान गम्भीर चिन्तित छ, र यस विषयमा जी–७ ले साझा रूपमा प्रतिक्रिया दिन जरुरी छ।”
चीनले अक्टोबर ९ मा दुर्लभ पृथ्वी तत्व, प्रविधि र वस्तुहरूको निर्यातमा नयाँ नियन्त्रण नीति लागू गरेको थियो। यी खनिजहरू अटोमोबाइल, इलेक्ट्रोनिक्स र रक्षा उद्योगमा अत्यावश्यक चुम्बक बनाउन प्रयोग हुन्छन्।
चीन विश्वकै प्रमुख दुर्लभ खनिज उत्पादक देश हो, र यी स्रोतहरू चीन र अमेरिकाबीचको व्यापार विवादको मुख्य विषय बनेका छन्।
अमेरिकी अर्थमन्त्री स्कट बेसेन्टले पनि बुधबार चीनको निर्णयको कडा आलोचना गर्दै यसलाई “चीन र बाँकी विश्वबीचको विवाद” को रूपमा व्याख्या गरेका थिए। उनले भनेका छन्, “हामी र हाम्रा सहयोगीहरू कुनै पनि हालतमा चीनको नियन्त्रणमा पर्ने छैनौं।”
कातो र बेसेन्टका भनाइहरू वाशिङ्टनमा भइरहेको अन्तर्राष्ट्रिय मुद्रा कोष र विश्व बैंकको वार्षिक बैठककै क्रममा आएका हुन्, जहाँ विश्वका प्रमुख अर्थनीति निर्माता भेला भएका छन्।
जी–७ समूहमा अमेरिका, जापान, क्यानाडा, फ्रान्स, जर्मनी, इटाली र बेलायत छन्। यी देशहरूले चीनको यो नयाँ निर्यात नीतिले दीर्घकालीन रूपमा पार्न सक्ने असरबारे संयुक्त छलफल अघि बढाउने अपेक्षा गरिएको छ।
