युद्ध अन्त्य गर्न वार्ता भइरहेको ट्रम्पको दाबी, इरानले भन्यो- ‘यो भ्रामक समाचार हो’
न्युयोर्क- अमेरिका र इरानका अधिकारीहरूले युद्ध रोक्ने विषयमा फरक-फरक कुरा गरेका छन्। अमेरिकी राष्ट्रपति डोनल्ड ट्रम्पले दुई देशबीच शत्रुता अन्त्य गर्न कुराकानी भइरहेको बताएका छन्। तर, इरानी संसद्का सभामुखले भने ट्रम्पको दाबीलाई खारेज गर्दै यसलाई ‘भ्रामक समाचार’ भनेका छन्।
ट्रम्पले सामाजिक सञ्जालमार्फत इरानसँग राम्रो छलफल भइरहेको बताए। उनले कुराकानी चलिरहेकाले इरानको ऊर्जा पूर्वाधारमाथि हुने भनिएको सैन्य आक्रमण पाँच दिनका लागि रोकेको जानकारी दिए। इरान यसपटक साँच्चिकै गम्भीर भएको र परमाणु हतियार नराख्न सहमत भएको ट्रम्पको भनाइ छ।
यता, इरानी संसद्का सभामुख मुहम्मद-बागेर गलिबाफले अमेरिकासँग कुनै वार्ता नभएको प्रस्ट पारे। उनले तेल बजारलाई प्रभाव पार्न अमेरिकाले यस्तो हल्ला फैलाएको आरोप लगाए। ट्रम्पले शान्ति सम्झौता हुन सक्ने बताएपछि सुरुमा कच्चा तेलको भाउ घटे पनि पछि बढेर प्रतिब्यारल एक सय डलर नाघेको छ।
मध्यपूर्वमा भने अझै लडाइँ र तनाव कायमै छ। इरानको राजधानी तेहरान र मध्य इरानको इस्फहानमा रहेका ग्यास केन्द्रहरूमा आक्रमण भएको छ। लेबनानको बेरुतमा पनि आक्रमण जारी छ, जहाँ पछिल्लो एक महिनामा एक हजारभन्दा बढी मानिसको ज्यान गइसकेको छ। उता, साउदी अरबले पनि आफ्नो आकाशमा चारवटा चालकरहित विमान नष्ट गरेको बताएको छ।
