इजरायली आक्रमणमा इरानी सैन्य कमान्डर ताङ्सिरी मारिएको पुष्टि

तेहरान— इरानले इजरायली हवाई आक्रमणमा परी आफ्ना महत्वपूर्ण सैन्य कमान्डर अलिरेजा ताङ्सिरीको मृत्यु भएको पुष्टि गरेको छ। स्ट्रेट अफ हर्मुजमा लगाइएको अवरोध हटाउने उद्देश्यले इजरायलले गरेको आक्रमणमा उनी गम्भीर घाइते भएका थिए।

उपचारका क्रममा ताङ्सिरीको मृत्यु भएको इरानी सञ्चारमाध्यम सेपाह न्यूजले जनाएको छ। इजरायली रक्षामन्त्री इजरायल काट्जले ताङ्सिरीको मृत्युको घोषणा गर्दै उनलाई विश्वव्यापी ऊर्जा संकट निम्त्याउने हर्मुज जलमार्ग नाकाबन्दीका मुख्य जिम्मेवार व्यक्तिको रूपमा चित्रण गरेका छन्।

तटीय सुरक्षामा खटिएकै बेला ताङ्सिरीमाथि आक्रमण भएको हो। उनी सन् २०१८ देखि इरानी सेनाको नेतृत्व सम्हाल्दै आएका थिए। पछिल्लो समय इजरायली र अमेरिकी कारबाहीमा मारिने उनी इरानका शीर्ष अधिकारीमध्ये एक हुन्। यसअघि फेब्रुअरी २८ मा सर्वोच्च नेता अली खामेनी र यसै महिनाको सुरुमा सुरक्षा प्रमुख अली लारिजानीसहित दर्जनौँ उच्च अधिकारीहरू मारिएका थिए।

ताङ्सिरीले केही समयअघि मात्रै हर्मुज जलमार्ग बन्द गर्ने र शत्रुमाथि कडा प्रहार गर्ने चेतावनी दिएका थिए। शीर्ष कमान्डरको यो हत्यालाई इरानका लागि ठुलो झट्का मानिएको छ।