परेड रद्द गराउन शंकास्पद वस्तु राख्ने व्यक्ति पक्राउ
न्युयोर्क- न्यु जर्सीमा एउटा ठुलो परेड रद्द गराउन आफैंले शंकास्पद वस्तु राख्ने एक व्यक्ति पक्राउ परेका छन्। ५६ वर्षका क्रिस्टोफर ओटिसले गत महिना सेन्ट प्याट्रिक्स डे परेड हुनुअघि प्रहरीलाई शंकास्पद वस्तु भेटिएको भन्दै खबर गरेका थिए।
उनले सुरुमा आफूले समुद्री किनारको बाटोमा हिँड्दा उक्त वस्तु फेला पारेको बताएका थिए। तर अनुसन्धानका क्रममा उनले नै त्यो वस्तु त्यहाँ राखेको खुलासा भएको छ। उनकै खबरका कारण सुरक्षाको डरले पुरै परेड नै रद्द गर्नुपरेको थियो।
प्रहरीले कुकुरसहित पुरै क्षेत्र खानतलासी गरे पनि अरू केही फेला पारेको थिएन। ओटिसलाई अहिले सार्वजनिक रूपमा डर फैलाएको र प्रहरीलाई झुटा सूचना दिएको आरोपमा हिरासतमा राखिएको छ।
उनका वकिलले भने उक्त वस्तुले कसैलाई पनि ठुलो क्षति पुर्याउन नसक्ने दाबी गरेका छन्। त्यो एउटा सामान्य पटाका जस्तो मात्र भएको र यसबाट कुनै खतरा नरहेको उनले बताए। अहिले यस विषयमा थप अनुसन्धान भइरहेको छ।
