अमेरिकाबाट निकालिएका १५ ल्याटिन अमेरिकी कंगो पुगे

न्युयोर्क- अमेरिकाबाट देशनिकाला गरिएका करिब १५ जना ल्याटिन अमेरिकी नागरिकहरू शुक्रबार बिहान कंगोको राजधानी किन्सासा पुगेका छन्। अमेरिकी वकिल अल्मा डेभिडले यो कुराको पुष्टि गरेकी हुन्। यो ट्रम्प प्रशासनले अफ्रिकी देशहरूसँग सम्झौता गरेर आप्रवासीहरूलाई तेस्रो देश पठाउने नीतिको नयाँ उदाहरण हो।

ती सबै व्यक्तिहरूलाई अमेरिकी अदालतले उनीहरूकै आफ्नै देश फर्काउन नपाउने गरी कानुनी सुरक्षा दिएको थियो। वकिल डेभिडका अनुसार कंगो सरकारले उनीहरूलाई केही समयका लागि मात्र त्यहाँ राख्ने योजना बनाएको छ। अहिले उनीहरू किन्सासाको एउटा होटलमा बसिरहेका छन्।

संयुक्त राष्ट्र संघसँग जोडिएको आप्रवासन सम्बन्धी संस्थाले उनीहरूलाई स्वेच्छाले आफ्नै देश फर्कन सहयोग गर्ने प्रस्ताव राख्नेछ। अमेरिकामा महिनौंसम्म हिरासतमा बसेर आफ्नै देश फर्कन नपरोस् भनी लडेका उनीहरूलाई फेरि त्यही देश फर्कने प्रस्ताव गरिनु निकै चिन्ताको विषय भएको ती वकिलले बताइन्।

कंगो सरकारले यसलाई मानव मर्यादा र अन्तर्राष्ट्रिय ऐक्यबद्धता अनुरूपको अस्थायी व्यवस्था भनेको छ। यसको सम्पूर्ण खर्च अमेरिकाले नै व्यहोर्नेछ। ट्रम्प प्रशासनले यस्तै सम्झौता अन्य कम्तीमा सात वटा अफ्रिकी देशहरूसँग पनि गरेको छ। एउटा प्रतिवेदनका अनुसार अमेरिकाले करिब ३ सय जना आप्रवासीलाई उनीहरूको आफ्नै देश बाहेक तेस्रो देश पठाउन कम्तीमा ४ करोड डलर खर्च गरिसकेको छ।