नक्कली सुरक्षा अधिकारी बनेर प्रहरीलाई झुक्याउने मेक्सिकन नागरिकले गल्ती स्वीकारे
न्युयोर्क- अमेरिकाको दक्षिणी क्यालिफोर्नियामा अध्यागमन अधिकारीको काममा अवरोध पुर्याउन नक्कली सीमा सुरक्षा एजेन्ट बनेका एक मेक्सिकन नागरिकले आफ्नो गल्ती स्वीकार गरेका छन्। जेमी अर्नेस्टो अल्भारेज-गोन्जालेज नाम गरेका ती व्यक्तिले सान डिएगो सहरमा वास्तविक अधिकारीलाई पछ्याएर झुक्याउने प्रयास गरेका थिए।
सरकारी वकिलहरूले बताए अनुसार उनले आफ्नो कालो रङको ट्रकलाई सरकारी गाडी जस्तै बनाएका थिए। गाडीमा नक्कली एन्टेना, सिसामा सुरक्षा एजेन्टको स्टिकर र गलत हिज्जे लेखिएको नक्कली नम्बर प्लेट राखिएको थियो। उनले गाडीभित्र हतकडी समेत झुन्ड्याएका थिए। उनले वास्तविक अधिकारीलाई पछ्याएपछि ती अधिकारीले आफ्नै अन्य टोली आएको ठानेर काम बिचमै छोडेका थिए।
वास्तविक अधिकारीले उनलाई भेटेर सोधपुछ गर्दा उनले उल्टै गाली गर्दै उनीहरूलाई उक्त क्षेत्र छाड्न भनेका थिए। अनुसन्धानका क्रममा उनले प्रहरीलाई रोक्न साथीहरू समेत बोलाएको र उनीसँग नक्कली ‘एफबिआई’ को परिचयपत्र पनि भएको खुलेको थियो। उनले नक्कली अधिकारी बनेको र गैरकानुनी रूपमा हतियार राखेको आरोप स्वीकारेका छन्। उनी धेरै वर्ष अघि घुम्ने भिसामा अमेरिका आएर लुकेर बसिरहेको सरकारी वकिलले बताए।
