मलेसियाको बेरोजगारी दर घटेर २.९ प्रतिशतमा झर्यो
क्वालालम्पुर- सन् २०२६ को पहिलो तीन महिनामा मलेसियाको बेरोजगारी दर घटेर २.९ प्रतिशतमा झरेको छ। मलेसियाको तथ्याङ्क विभागका अनुसार रोजगारी र काम गर्ने मानिसको सङ्ख्यामा सुधार आएकाले बेरोजगारी घटेको हो।
अघिल्लो पटक ३ प्रतिशत रहेको बेरोजगारी दर अहिले ०.१ प्रतिशतले घटेको हो। बेरोजगार मानिसको सङ्ख्या घटेर अहिले ५ लाख ६ हजार ५ सय कायम भएको छ। यसैगरी, रोजगारी पाउने मानिसको सङ्ख्या बढेर १ करोड ६७ लाख ३० हजार पुगेको छ भने कुल श्रम शक्ति पनि १ करोड ७२ लाख ३० हजार पुगेको छ।
मलेसियाको बलियो अर्थतन्त्रले गर्दा आउँदा महिनाहरूमा पनि श्रम बजार यस्तै स्थिर रहने विभागको अनुमान छ। तर, विश्वको ऊर्जा बजारमा आउने उतारचढाव र बाहिरी राजनीतिक घटनाले भने आर्थिक वृद्धिमा असर गर्न सक्ने विभागले चेतावनी दिएको छ। यस्तो अनिश्चित अवस्थाको सामना गर्न व्यापार र कामदार दुवै सचेत रहनुपर्ने विभागले बताएको छ।
