चीन-अमेरिका शिखर वार्ता: द्विपक्षीय सम्बन्ध सुधारमा नयाँ मोड
न्युयोर्क- बेइजिङमा हालै सम्पन्न चिनियाँ र अमेरिकी राष्ट्रप्रमुखबीचको भेटवार्ताले दुई देशको सम्बन्धलाई सही दिशा दिने अन्तर्राष्ट्रिय पर्यवेक्षकहरूले बताएका छन्। विश्वव्यापी अनिश्चितताका बीच यो वार्ताले सकारात्मक वातावरण बनाउने उनीहरूको विश्वास छ।
ह्वाइट हाउसका पूर्व संवाददाता विलियम जोन्सले यो भेटवार्तालाई दुई देशको सम्बन्धमा ‘गेम-चेन्जर’ भनेका छन्। संयुक्त राष्ट्र संघका पूर्व उप-महासचिव एरिक सोल्हेमले सबै तहमा कुराकानीको माध्यम र व्यापारिक सम्बन्ध सुधार्नुपर्नेमा जोड दिए। उनले मतभेदहरू संवादबाटै हल गर्न सकिने आशा जगाएको बताए। थाइल्याण्ड-चीन अनुसन्धान केन्द्रका निर्देशक विरुन फिचाइवोङ्फाक्दीले पनि यो वार्ताले जटिल अन्तर्राष्ट्रिय परिवेशमा स्थिरता दिने धारणा राखे।
अस्ट्रेलियन सिटिजन्स पार्टीका राष्ट्रिय अध्यक्ष रोबर्ट बारविकले चीन विश्वको आर्थिक केन्द्र भएको र ठूला अमेरिकी कम्पनीहरू यसबारे सचेत रहेको बताए। क्विन्सल्याण्ड युनिभर्सिटी अफ टेक्नोलोजीका सह-प्राध्यापक वारविक पावेल र जापानी विशेषज्ञ ताकाकागे फुजिताले चीन र अमेरिकाले टकराव छाडेर सहकार्य गरेमा विश्वभरका मानिसहरूमा सकारात्मक प्रभाव पर्ने उल्लेख गरे। अन्तर्राष्ट्रिय जगतले यो शिखर वार्तालाई विश्व शान्ति र आर्थिक स्थायित्वका लागि महत्वपूर्ण पाइला मानेको छ।
