विश्वकप फुटबलका लागि न्युयोर्कमा ट्राफिक नियम कडा
न्युयोर्क- सन् २०२६ को फिफा विश्वकप फुटबल सुरु हुन अब सात दिन मात्र बाँकी रहँदा न्युयोर्कमा गाडीको चाप नियन्त्रण गर्न कडा ट्राफिक नियम घोषणा गरिएको छ। मेयर जोहरान माम्दानी र गभर्नर क्याथी होचुलले संयुक्त रूपमा यस्तो योजना सार्वजनिक गरेका हुन्। खेल हुने दिनहरूमा म्यानहट्टन क्षेत्रमा बस गुड्ने लेनहरू हेरफेर गरिनेछ, गाडीहरूलाई अन्यत्रै डाइभर्ट गरिनेछ र सामान ढुवानीमा समेत प्रतिबन्ध लगाइनेछ।
नयाँ नियम अनुसार खेल सुरु हुनुभन्दा ६ घण्टा अघिदेखि र खेल सकिएको ३ घण्टा पछिसम्म ठूला ट्रकहरूलाई सामान ओसारपसार गर्न दिइने छैन। यो नियम ३० देखि ६० स्ट्रीट बीचको क्षेत्रमा लागू हुनेछ। पत्रकार सम्मेलनका क्रममा मेयर माम्दानीले ठट्टा गर्दै न्युयोर्क निक्सका चर्चित बास्केटबल खेलाडी जालेन ब्रन्सनलाई भने यो सामान ढुवानीको प्रतिबन्ध लागू नहुने र उनलाई छुट दिइने बताए। यद्यपि, साना गाडी, भ्यान, डेलिभरी बाइक र आपत्कालीन सवारी साधनलाई भने यो नियम लागू हुने छैन।
पेन स्टेसनमा भीडभाड कम गर्न खेल सुरु हुनु ४ घण्टा अघिदेखि टिकट भएका मानिसहरूलाई मात्र रेल सेवा उपलब्ध गराइनेछ। सर्वसाधारणका लागि सबवे र अन्य वैकल्पिक यातायातका साधनहरू बढाइने बताइएको छ। गभर्नर होचुलले न्युयोर्क यस्ता ठूला कार्यक्रमहरू व्यवस्थापन गर्न सक्षम रहेको भन्दै मानिसहरूलाई घरमा नबस्न र सहरमा आएर विश्वकपको उत्सव मनाउन आग्रह गरेकी छन्।
