कर्तव्य पालनाका क्रममा ज्यान गुमाएका १३६ कर्मचारीलाई राष्ट्र संघको श्रद्धाञ्जली
संयुक्त राष्ट्र संघले सन् २०२५ मा कर्तव्य पालना गर्दा ज्यान गुमाएका १३६ जना कर्मचारीको सम्मानमा श्रद्धाञ्जली सभा आयोजना गरेको छ। न्युयोर्कस्थित मुख्यालयमा भएको वार्षिक स्मृति सभामा महासचिव एन्टोनियो गुटेरेसले दिवंगत कर्मचारीप्रति सम्मान व्यक्त गरे।
गुटेरेसका अनुसार ज्यान गुमाउनेमा ९७ जना निजामती कर्मचारी र ३९ जना शान्ति सैनिक छन्। ३२ फरक देशका नागरिक भए पनि उनीहरू विश्व सेवाको उद्देश्यमा एकजुट रहेको उनले बताए।
ज्यान गुमाउनेमध्ये ८० जना गाजामा रहेको राष्ट्र संघको राहत तथा कार्य निकायका कर्मचारी हुन्। राष्ट्र संघको इतिहासमा कुनै एउटै द्वन्द्व वा विपद्मा यति धेरै कर्मचारी मारिएको यो पहिलो पटक हो। तीमध्ये कतिको घरमै मृत्यु भयो भने कतिको सेवा प्रवाहका क्रममा ज्यान गयो।
महासचिव गुटेरेसले राष्ट्र संघका कर्मचारीलाई कहिल्यै पनि निशाना बनाउन नहुनेमा जोड दिए। उनले विश्वभर काम गर्ने कर्मचारीको सुरक्षाप्रति प्रतिबद्धता जनाउँदै यस्ता घटनामा संलग्नलाई जवाफदेही बनाउनुपर्ने माग गरे। कठिन र खतरनाक ठाउँमा सेवा गर्ने कर्मचारीको समर्पण नै मानवताको ठूलो गुण भएको भन्दै उनले उनीहरूको बलिदानको स्मरण गरे।
