ब्रुकलिन अस्पतालमा बिरामीमाथि यौन दुर्व्यवहार: एक पक्राउ
न्युयोर्क- अमेरिकाको ब्रुकलिनस्थित ब्रुकडेल अस्पतालमा एक महिला बिरामीमाथि यौन दुर्व्यवहार गरेको आरोपमा एक पुरुष नर्स पक्राउ परेका छन्। कुरीयाकोस पाउलोस नाम गरेका ती नर्सलाई यौन दुर्व्यवहार र जबरजस्ती छोएको आरोपमा मुद्दा चलाइएको छ।
यो घटना गत डिसेम्बर ५ मा रातिको ड्युटीको समयमा भएको थियो। बिरामीले भोलिपल्टै प्रहरीलाई खबर गरे पनि उनी हालै मात्र पक्राउ परेका हुन्। ती बिरामीले टेलिभिजनमा आफ्नो कुरा राखेको एक सातापछि मात्र प्रहरीले कदम चालेको हो। नर्सका वकिलले भने यी सबै आरोप झुटो भएको दाबी गर्दै उनले अदालतमा आफू निर्दोष रहेको बयान दिएको बताए।
पीडित महिलाले अस्पताल प्रशासनविरुद्ध पनि लापरवाहीको मुद्दा दर्ता गरेकी छिन्। राम्रोसँग पृष्ठभूमि नबुझी यस्तो व्यक्तिलाई काममा राखेको भन्दै उनले अस्पतालको आलोचना गरिन्। ती नर्समाथि यसअघि सन् २०२० र २०२१ मा पनि न्यु जर्सीमा यस्तै प्रकारको आरोप लागेको खुलेको छ। यति गम्भीर आरोप लाग्दा पनि न्युयोर्कमा उनको नर्सिङ अनुमतिपत्र भने अहिलेसम्म खारेज भइसकेको छैन।
