विश्वकपको क्रेजले न्युयोर्कमा फुटबलको आकर्षण बढ्योः के यो लामो समय टिक्ला?
न्युयोर्क- विश्वकप फुटबल २०२६ को उत्साहसँगै न्युयोर्क सहरमा फुटबल खेल्ने र सिक्नेहरूको संख्या अत्यधिक बढेको छ। विशेष गरी साना बालबालिका र नयाँ खेलाडीहरूमा यस खेलप्रति ठूलो आकर्षण देखिएको छ।
न्युयोर्कको सबैभन्दा ठूलो वयस्क फुटबल लिग ‘NYC Footy’ मा यस सिजन ९,५०० भन्दा बढी नयाँ खेलाडी दर्ता भएका छन्, जुन गत वर्षको तुलनामा धेरै हो। तीमध्ये ४५.४ प्रतिशत खेलाडीहरू बिल्कुलै नयाँ वा प्रारम्भिक चरणका छन्। लिगका सह-संस्थापक तारेक पेर्टेवले यो वृद्धि १०० प्रतिशत विश्वकपको प्रभाव भएको बताएका छन्।
वयस्क मात्र होइन, ५ देखि ७ वर्षका बालबालिकाहरू पनि मेस्सी, रोनाल्डो र एम्बाप्पेजस्ता आफ्ना मनपर्ने खेलाडीबाट प्रभावित भएर फुटबल सिक्न हौसिएका छन्। क्वीन्समा रहेको ‘५ स्टार सकर एकेडेमी’ मा यस गर्मीयाममा २० प्रतिशतले दर्ता बढ्ने अनुमान गरिएकोमा ७० प्रतिशतले वृद्धि भएको छ। जर्मन क्लब बायर्न म्युनिखले रकफेलर सेन्टरमा आयोजना गरेको प्रशिक्षणमा पनि केही मिनेटमै सबै सिट भरिएका थिए।
तर, यो उत्साह लामो समय टिकाइराख्न चुनौतीहरू पनि छन्। न्युयोर्कमा फुटबल मैदानहरूको निकै अभाव छ। साउथ ब्रान्क्स युनाइटेड जस्ता संस्थामा अहिले नै २,००० विद्यार्थी छन् र स्थान, बजेट तथा जनशक्तिको अभावले गर्दा नयाँ विद्यार्थी लिन नसकेर लामो ‘वेटिङ लिस्ट’ राख्नुपरेको छ।
जुलाई १९ मा विश्वकप सकिएपछि शरद र जाडो मौसममा सीमित मैदानहरूका कारण यी हजारौं नयाँ खेलाडीहरूलाई कहाँ र कसरी खेलाउने भन्ने चिन्ता प्रशिक्षक र आयोजकहरूमा बढेको छ।
