स्ट्रेट अफ होर्मुजमा व्यापारिक जहाजको सुरक्षा गर्न अमेरिका र बेलायतले गठबन्धन बनाउँदै
न्युयोर्क- अमेरिका र बेलायतले स्ट्रेट अफ होर्मुजमा व्यापारिक पानीजहाजको सुरक्षा गर्न एउटा अन्तर्राष्ट्रिय समुद्री गठबन्धन बनाउने तयारी गरेका छन्। यसै विषयमा छलफल गर्न आउँदो हप्ता लन्डनमा उच्च स्तरीय बैठक बस्ने योजना छ।
बैठकमा अमेरिकी रक्षा मन्त्री पीट हेग्सेथसहित पश्चिमी र मध्य पूर्वी देशका रक्षा मन्त्री तथा सैन्य नेताहरू सहभागी हुने सम्भावना छ। अमेरिका, बेलायत र फ्रान्सले यो गठबन्धन बनाउन अरू धेरै देशसँग कुराकानी गरिरहेका छन्। ह्वाइट हाउसले यसको पुष्टि गरेको छ तर बेलायती दूतावासले यसबारे केही बोलेको छैन।
इरानसँगको विवादका कारण होर्मुज जलमार्गमा व्यापारिक जहाजमाथि आक्रमण र नाकाबन्दी हुन थालेपछि विश्वभर तेलको आपूर्तिमा समस्या भएको छ भने कच्चा तेलको मूल्य पनि तीव्र रूपमा बढेको छ। अमेरिकी राष्ट्रपति डोनाल्ड ट्रम्पले व्यापारिक जहाजमाथि आक्रमण भए बदलामा इरानका पुल वा विद्युत् केन्द्रमा आक्रमण गर्ने चेतावनी दिएका छन्। अमेरिकाले तत्काल आफ्नो कारबाही नरोक्ने सङ्केत दिएको छ।
यसैबीच, तनाव कम गर्न र जलमार्ग पुनः खुलाउने विषयमा छलफल गर्न ओमानको एउटा टोली शुक्रबार इरानको राजधानी तेहरान पुगेको छ। इरानका विदेश मन्त्री अब्बास अराघची र ओमानका विदेश मन्त्री बद्र अलबुसाइदीबीच यस क्षेत्रको समुद्री सुरक्षा र जहाजको आउजाउबारे फोनमा कुराकानी भएको इरानी सरकारी समाचार संस्था इरनाले जनाएको छ।
