बर्लिनको एलजीबिटीक्यु प्लस परेडमा गाडीको ठक्करबाट एकको मृत्यु, १५ घाइते
जर्मनीको बर्लिनमा भइरहेको एलजीबिटीक्यु प्लस समुदायको प्राइड परेडमा एउटा गाडीले भिडलाई ठक्कर दिँदा एक जनाको ज्यान गएको छ। यस घटनामा कम्तीमा १५ जना घाइते भएका छन्।
प्रहरीका अनुसार शनिबार राति एउटा सेतो भ्यान टियरगार्टन पार्कमा घुसेर मानिसहरूलाई ठक्कर दिँदै एउटा रुखमा गएर ठोक्किएको थियो। घाइतेमध्ये केहीको अवस्था अत्यन्त गम्भीर छ। घटनालगत्तै प्रहरीले परेड र त्यहाँ भइरहेको सांगीतिक कार्यक्रम रोकेको छ।
अहिले घटनास्थलमा धेरै प्रहरी, दमकल र एम्बुलेन्स खटिएका छन्। प्रहरी अधिकारी फ्लोरियन नाथले शंकास्पद व्यक्तिहरूको तीव्र रूपमा खोजी भइरहेको बताए। उनले सबैलाई तत्काल घटनास्थल छोडेर घर जान र पार्कको बाटो प्रयोग नगर्न आग्रह गरे।
यो युरोपकै सबैभन्दा ठूलो प्राइड परेडमध्ये एक हो, जसलाई जर्मनीमा क्रिस्टोफर स्ट्रिट डे भनेर चिनिन्छ। घटना हुनुभन्दा अघि लाखौं मानिसहरू सडकमा नाच्दै र रमाइलो गर्दै शान्तिपूर्ण रूपमा परेडमा सहभागी भएका थिए।
