फ्रान्स र स्पेनको जंगलमा भीषण आगलागीः साढे दुई लाख मानिस विस्थापित
न्युयोर्क- फ्रान्स र स्पेनका जंगलहरुमा लागेको भीषण आगलागीका कारण साढे दुई लाखभन्दा बढी मानिस आफ्नो घर छाड्न बाध्य भएका छन्। स्पेनमा आगोमा परेर एक जनाको ज्यान गएको छ भने आगो निभाउने क्रममा दर्जनौं अग्नि नियन्त्रकहरु घाइते भएका छन्।
फ्रान्सले आगो निभाउन सेनाको ठूलो कार्गो विमान नै प्रयोग गरेको छ। आगलागी नियन्त्रणमा सुरक्षाकर्मी खटाउनु परेकाले फ्रान्सको प्रसिद्ध साइकल दौड प्रतियोगिता ‘टुर डे फ्रान्स’ को अन्तिम चरणको दूरी समेत घटाइएको छ। त्यहाँका गृहमन्त्री लरेन्ट नुनेजले आगो प्रसिद्ध सहर बोर्डोतर्फ फैलिन सक्ने भन्दै सतर्कता अपनाइएको बताए। आगो नियन्त्रण गर्न हजारौं अग्नि नियन्त्रक र सेना खटिएका छन्।
उता, स्पेन सरकारले आगलागीका कारण इतिहासमै पहिलो पटक राष्ट्रिय संकटकाल घोषणा गरेको छ। मध्य स्पेनमा मात्रै ७० हजार मानिसलाई सुरक्षित स्थानमा सारिएको छ। स्पेनका प्रधानमन्त्री पेड्रो सान्चेजले स्थिति निकै गाह्रो रहेको बताए। अत्यधिक गर्मी र तीव्र हावाका कारण आगो यति छिटो फैलियो कि नियन्त्रण गर्न निकै मुस्किल परिरहेको छ।
युरोपमा बढेको अत्यधिक गर्मी र जलवायु परिवर्तनका कारण यो वर्ष जंगलहरु एकदमै सुक्खा भएका छन्, जसले गर्दा सजिलै आगो फैलिरहेको छ। अहिले फ्रान्स र स्पेनलाई सघाउन इटाली, ग्रीस, जर्मनी लगायत अन्य युरोपेली देशहरुले पनि हेलिकप्टर र विमान पठाएर मद्दत गरिरहेका छन्।
