‘इसाइयास’ आँधीको त्रास : अमेरिकाका दुई राज्यमा संकटकाल, जनजीवन प्रभावित हुने खतरा

न्युयोर्क- मेक्सिकोको पूर्वी समुद्री क्षेत्रमा विकसित भएको ‘इसाइयास’ नामक समुद्री आँधी शक्तिशाली रूप लिँदै अमेरिकाको खाडी तटीय क्षेत्रतर्फ अघि बढेको छ। मौसमविद्हरूका अनुसार यो आँधी चाँडै नै भीषण आँधीमा परिणत भएर शुक्रबार रातिसम्म अमेरिकी तटीय क्षेत्रमा बज्रिने सम्भावना छ।

आँधीको जोखिम बढेपछि फ्लोरिडा र अलाबामा राज्यका दर्जनौँ काउन्टीहरूमा संकटकाल घोषणा गरिएको छ। आपत्कालीन उद्धार टोलीहरूलाई तयारी अवस्थामा राखिएको छ भने तटीय क्षेत्रका बासिन्दाहरूलाई सुरक्षित रहन सतर्क गराइएको छ। बाढीबाट जोगिन स्थानीयहरूले बालुवाका बोरा राखेर घर सुरक्षा गर्न थालेका छन् भने खाद्यान्न र आवश्यक सामान सुरक्षित स्थानमा सारेका छन्।

अमेरिकी राष्ट्रिय आँधी केन्द्रका अनुसार यो आँधी प्रतिघण्टा १७८ किलोमिटरभन्दा बढी गतिको ‘क्याटागोरी ३’ सम्म पुग्न सक्ने चेतावनी दिइएको छ। यसले गर्दा मिसिसिपीदेखि फ्लोरिडासम्म समुद्रमा भयानक छाल उठ्ने र भारी वर्षाका कारण बाढी आउने खतरा छ।

आँधी नजिकिएपछि खाडी क्षेत्रमा हुने कच्चा तेल उत्पादनमा २५ प्रतिशत कटौती गरिएको छ भने कामदारहरूलाई सुरक्षित ठाउँमा सारिएको छ। यस्तै, अलाबामामा लाखौँ पर्यटक भेला हुने चर्चित समुद्री खाना महोत्सव रद्द गरिएको छ। शनिवार हुने तय भएको कलेज फुटबल खेल समेत प्रभावित हुनसक्ने बताइएको छ।