ममता काफ्ले हत्या प्रकरण : नरेशले किनेको आरामा भेटियो रगत र कपाल, गुगल सर्च झनै शंकास्पद

अमेरिकाको भर्जिनियामा पत्नी ममता काफ्लेको हत्या गरी शव टुक्राएको आरोप लागेका नरेश भट्टको मुद्दामा नयाँ शंकास्पद प्रमाणहरु फेला परेका छन्। अदालतमा चलिरहेको चौथो साताको सुनुवाइमा नरेशले किनेको आराभित्र रगत र कपालका टुक्राहरु भेटिएको अनुसन्धान अधिकारीले बताएका छन्।

प्रहरीका अनुसार नरेशले गत जुन महिनामा किनेको हरियो रङको आराको भित्री भागमा रगत जस्तो रातो दाग र एकदेखि दुई इन्च लामा कपालका टुक्राहरु भेटिएका हुन्। यसैगरी, जुलाई ३१ तारिखमा नरेशको घरमा दुई घण्टाको बीचमै १६० ग्यालनभन्दा बढी पानी प्रयोग भएको तथ्यांक पनि अदालतमा पेस गरिएको छ। सामान्यतया घरमा यति धेरै पानी छोटो समयमा प्रयोग नहुने हुनाले यसलाई शंकास्पद मानिएको छ।

नरेशको इन्टरनेट सर्च विवरण पनि अनुसन्धानमा पेस गरिएको छ। पत्नी बेपत्ता हुनुभन्दा महिनौँ अघि उनले गुगलमा ‘पत्नीको मृत्यु भएपछि अर्को विवाह गर्न कति समय लाग्छ’ र ‘प्रेमिकालाई नयाँ वर्षको शुभकामना सन्देश’ जस्ता कुराहरु खोजेका थिए। त्यस्तै, प्रहरीले एउटा पेट्रोल पम्प नजिकै रहेको पुरानो कपडा संकलन गर्ने भाँडोबाट रगत लागेको म्याट र ममताले सामाजिक सञ्जालमा लगाएको जस्तै देखिने नेपाली पोसाकसहितका झोलाहरु पनि बरामद गरेको छ।

सुनुवाइका क्रममा उनीहरुका साथीहरुले नरेश र ममताबीच पारिवारिक विवाद रहेको र नरेशले सम्बन्ध अन्त्य गर्न चाहेको बताएका छन्। नरेशले अगस्टमा आफ्नो कार बेचेको र प्रहरीले उक्त कार फेला पार्दा त्यो पूरै सफा गरिएको अवस्थामा भेटिएको अनुसन्धानमा संलग्न अधिकारीले बताएका छन्।