चितवन पुगेर रविले भने– ‘व्यक्तिभन्दा नीति देशभर पुग्नुपर्छ’
राष्ट्रिय स्वतन्त्र पार्टी (रास्वपा) का सभापति रवि लामिछानेले आफ्नो निर्वाचन क्षेत्रमा व्यक्तिभन्दा नीति र प्रणाली पुग्नुपर्ने बताएका छन् । सोमबार भरतपुर विमानस्थलमा पत्रकारसँग कुरा गर्दै उनले यस्तो बताएका हुन् ।
आफू चितवन आउन ढिला भए पनि यहाँ नीतिगत कामहरु भइरहेको उनले स्पष्ट पारे । जिम्मेवारी धेरै भएकोले व्यक्ति उपस्थित हुन ढिला भए पनि पार्टी र सरकारका नीतिहरु भने देशभर पुगिरहेको उनले दाबी गरे ।
चितवन क्षेत्र नम्बर २ का सांसद समेत रहेका रवि शुक्रबारसम्म चितवनका विभिन्न कार्यक्रममा सहभागी हुँदैछन् । रास्वपा चितवनका सभापति मिनिमाधव खनालका अनुसार उनले सोमबार पार्टी कार्यालयमा जिल्लादेखि स्थानीय तहसम्मका पदाधिकारीसँग सङ्गठनात्मक छलफल गरेका छन् ।
यसैगरी, शुक्रबार बिहान उनले नारायणी नदी किनारको कटान क्षेत्रको अवलोकन र सरोकारवालासँग छलफल गर्ने कार्यक्रम तय भएको छ ।
