अर्थमन्त्री वाग्ले ‘टाइम’को १०० प्रभावशाली सूचीमा
न्युयोर्क- जलवायु परिवर्तनको मुद्दामा नेपालको आवाज विश्वसामु पुर्याएको भन्दै अर्थमन्त्री डा. स्वर्णिम वाग्ले प्रतिष्ठित ‘टाइम’ पत्रिकाको विश्वका १०० प्रभावशाली व्यक्तित्वको सूचीमा परेका छन्।
गत अगस्टमा रसुवा-भोटेकोसीमा आएको विनाशकारी बाढीपछि उनले विश्व मञ्चहरूमा जलवायु न्यायका लागि सशक्त पैरवी गरेका थिए। सो बाढीमा परेर १५ सयभन्दा बढी मानिसको ज्यान गएको थियो भने हजारौं विस्थापित भएका थिए।
यस घटनाले थोरै मात्रै हरितगृह ग्यास उत्सर्जन गर्ने नेपालजस्ता विकासशील देश कसरी जलवायु संकटको मारमा छन् भन्ने देखाएको टाइमले जनाएको छ। अर्थमन्त्री वाग्लेले नेपालले सिर्जना नै नगरेको संकटको अग्रपंक्तिमा उभिनुपरेको भन्दै अन्तर्राष्ट्रिय समुदायलाई जिम्मेवार बन्न आह्वान गरे र विश्वलाई यो कुरा बिर्सन दिएनन्।
बाढीपछिको पुनर्निर्माणका लागि करिब ५ अर्ब डलर लाग्ने अनुमानसहित सरकारले सबैभन्दा धेरै ग्यास उत्सर्जन गर्ने चीन, अमेरिका र भारतसँग औपचारिक रूपमै क्षतिपूर्ति मागेको थियो। वाग्लेले जलवायु प्रकोपबाट जोखिममा रहेका समुदायको राहतका लागि स्थापित ‘हानि तथा क्षति कोष’बाट रकम उपलब्ध गराउन माग गरे।
यसैको फलस्वरूप, अक्टोबर २२ मा संयुक्त राष्ट्रसंघले २ करोड १६ लाख डलर भुक्तानी गर्न अस्थायी स्वीकृति दियो। विश्व इतिहासमै यस कोषको रकम प्रयोग भएको यो पहिलो पटक हो।
